Евгений Пригожин «Вагнер» ХҲКни ўзи ташкил қилганини тан олди

^{Фото: РИА Новости}
Россия президенти Владимир Путин билан яқин алоқадор саналган россиялик тадбиркор Евгений Пригожин Европа, Яқин Шарқ, Африка ва Лотин Америкасидаги операцияларда иштирок этган «Вагнер» хусусий ҳарбий компанияси асосчиси эканлигини тан олди. Тегишли маълумот Пригожин билан боғлиқ бўлган «Конкорд» компанияси матбуот хизматининг «Блокнот» нашри сўровига жавобида келтирилган, у 26 сентябр, душанба куни Россия интернет ОАВда эълон қилинди.

Пригожин ўз жавобида Донбасс айирмачиларини қўллаб-қувватлаш учун 2014 йилнинг май ойида ҳарбийлаштирилган тузилма тузганини айтади. Ўшанда, унинг таъкидлашича, «ватанпарварлар гуруҳи туғилди, улар кейинчалик «Вагнер» БТГ номини олди».

Аввалроқ Евгений Пригожин «Вагнер» ХҲК билан алоқаларини бир неча бор рад этган эди. Кўпгина Ғарб давлатлари ва Россия оммавий ахборот воситалари уни «вагнерчилар»ни молиялаштиришда айблади. Тадбиркор уни ХҲК эгаси деб атаган журналистларни бир неча бор судга берган. «Вагнер» ХҲК жангчилари Сурия, Ливия, Украина ва Марказий Африкада пайқалган.

ХҲКнинг ёлланма аскарлари кўп йиллар давомида турли қуролли тўқнашувларда Кремль томонидан яширин иштирок этганликда гумон қилинган.Москва хусусий ҳарбийлаштирилган гуруҳлар билан алоқаларини рад этиб келади.

Янгиликлар