21:06 / 19.10.2022

Caritas: Украинада одамларга ёрдам кўрсатиш тобора хавфли бўлиб боряпти

^{Фото: AP}
Caritas гуманитар ташкилоти Украинага ёрдам хайриячиларнинг ўзлари учун тобора хавфли бўлиб бораётганини хабар қилди. Ҳужумлар туфайли улар бошпаналарда яшириниши ёки ҳатто эвакуация қилиниши керак бўляпти.

Украинада тинч аҳоли объектларига ҳужумлар кучайгани гуманитар ёрдам кўрсатишни қийинлаштирмоқда. Бу ҳақда 19 октябр, чоршанба куни Caritas Ukraine хайрия ташкилоти раҳбари Татяна Ставнич маълум қилди, деб ёзади KNA.

Caritas бутун Украина бўйлаб ишлашда давом этмоқда, аммо хайрихоҳлар, бошқа одамлар каби, бомба бошпаналарида кўпроқ вақт ўтказишга мажбур. Ҳатто тарқатиш пунктлари ва гуманитар ташкилотларнинг карвонлари ўққа тутилмоқда. Бундан ташқари, ушбу ҳафтада Caritas’нинг 60 нафар ходими Мариуполдан эвакуация қилиниши керак бўлди, улар мамлакат шарқидан Черкассига етказилди. Апрель ойида Мариупол маркази бутунлай вайрон қилинган, Caritas компаниясининг икки ходими ва уларнинг беш нафар яқини вафот этган.

Caritas веб-сайтида, октябрь ойида содир бўлган йирик ракета ҳужумларидан сўнг, Татяна Ставнич ва унинг Caritas Spes-Ukraine’дан бўлган ҳамкасблари зўравонликни тўхтатишга чақирди. Уларнинг таъкидлашича, Украинадаги шусиз ҳам оғир бўлган гуманитар вазият мамлакат яқинлашиб келаётган қаттиқ қишга тайёргарлик кўраётган бир пайтда кескин ёмонлашди.

«Ушбу зарбалардан жабр кўрганлар кундалик ишлари билан шуғулланаётган оддий одамлар эди: ота-оналар фарзандларини мактабга олиб кетаётган бўлган, ишга машинада одамлар кетишаётган эди. Мамлакат бўйлаб одамлар, жумладан Caritas ходимлари бугун (11 октябрь) бир-бирларидан, дўстлари ва яқинларидан: «Хавфсиз жойдамисиз?» деб сўраб, жавобни интизорлик билан кутишди», дейилади Ставнич баёнотида.

Хайриячиларнинг таъкидлашича, Украинанинг кўплаб минтақаларида ҳарбий ҳаракатлар туфайли электр, сув, газ ва телефон алоқалари узилиб қолган. Иситиш материаллари, ҳатто ўтин ҳам етарли эмас. Caritas, айниқса, қийин вазиятга тушиб қолган одамларни унутмасликни ва уларнинг ҳаётини сақлаб қолиш учун ишини қўллаб-қувватлашни сўради.

Ташкилот ҳисоб-китобларига кўра, ҳозирда Украина бўйлаб мингга яқин Caritas ходимлари ва кўплаб кўнгиллилар урушдан жабр кўрган ҳамда кўчирилган одамларга ёрдам бермоқда. Улар озиқ-овқат пакетларини тарқатяпти, вақтинчалик уй-жой ва тиббий ёрдамни ташкил қиляпти. Бугунги кунга қадар бир миллионга яқин одам Caritas’дан ёрдам олди.