Европанинг энг машҳур жиноятчиларидан бири Эквадорда қўлга олинди

^{Фото: Crime Stoppers International}
Испания, Эквадор ва Колумбия полиция кучларининг қўшма операцияси натижасида Интерпол ва Испания полицияси томонидан қидирилаётган Вивиана Андреа Валехо Гутиеррес ҳибсга олинди.

Европада энг кўп қидирилаётган жиноятчилар рўйхатида бўлган аёл 28 октябрь куни Эквадорнинг Мачала шаҳрида қўлга олинган.

Гутиеррес жинсий эксплуатация, гиёҳванд моддалар савдоси ва пул ювиш мақсадида одам савдосига алоқадорликда гумонланмоқда. Ушбу моддалар бўйича ҳибсга олинган шахс 32 йилгача қамоқ жазосига ҳукм қилиниши мумкин.

Испания полициясига кўра, Вивиана Гутиеррес аёлларни Колумбиядан Испанияга олиб келиб, фоҳишаликка мажбурлаган халқаро жиноий ташкилот аъзоси бўлган.

Қайд этилишича, у колумбиялик аёлларга Испанияга кўчиб ўтишни таклиф қилган, бунинг учун улар ташкилотга 1,5 минг евро тўлаши учун у ерда фоҳишалик билан шуғулланишга мажбурланган.

Испанияга борганидан сўнг, уларга бу миқдор 3 минг еврога ошгани ҳақида маълум қилинган. Аёлларга яшаш уйидан кунига бир соатдан ортиқ вақтга чиқиб кетиши тақиқланган, улардан кечаю кундуз давомида фоҳишалик билан шуғулланиш, шунингдек, мижозларга кокаин сотиш талаб қилинган.

Илгари Вивиана Гутиеррес Испанияда яшаган, аммо қидирувга берилганидан кейин ватани Колумбияга қочган.

Колумбия полицияси аёлнинг Эквадор чегарасига яқин жойда яшириниб юрганини аниқлаб, испаниялик ҳамкасбларига хабар берганидан сўнг, уни ушлаш бўйича қўшма операция ўтказилган.