«Энди фақат Путинни эмас, ҳаммамизни ёмон кўришади» – рус телеканалида «кутилмаган чиқиш» кетиб қолди

Россия Украинага бостириб кирганидан кейин мамлакатнинг барча сиёсий телеканаллари уруш пропагандасига хизмат қилмоқда. Аммо баъзи-баъзида кутилмаган чиқишлар ҳам жонли эфирда кетиб қоляпти.

НТВ телеканалининг уруш муҳокамасига бағишланган навбатдаги сонига интернетдаги у ҳақда маълумотларда Тошкентда туғилгани айтиладиган Дума собиқ депутати Борис Надеждин ҳам таклиф қилинди. У урушни бошлашнинг ўзи хато бўлгани, айнан уруш сабаб Украинада нафақат Россия президенти Путинни, балки бошқа россияликларни ҳам ёмон кўриб қолишганини айтди.

«Буни (урушни) бошлаш қанчалик даҳшатли хато бўлгани энди Путиннинг ўзига ҳам кўринмоқда. Бошидан бу колониал урушга айланиб кетиши аниқ эди. Бу нима дегани? Айтайлик, Россия деган улкан давлатда одамлар жимгина яшаб юрган, ресторанга бораётган, театрга, футболга тушаётган, чет элга саёҳат қилиш учун бораётганди, ҳаммаси ажойиб эди, шундайми?

Улар (Кремлдагилар) шундай режа қилишганди: шартнома асосида хизмат қилаётганлар, росгвардиячилар ва бошқаларни Украинага юборамиз, Украина армияси парчаланади, Зеленский қўрқиб Ғарбга қочиб кетади, [унинг ўрнига] Медведчукними Януковичними қўямиз, тамом. Шундай ўйлашганди, тўғрими йўқми?» деди собиқ Дума депутати Россиянинг бирламчи режалари ҳақида ўз фикрларини билдирар экан.

Надеждиннинг бу сўзлари кўрсатув бошловчиси ва қолган иштирокиларда истерика келтириб чиқарди. Улар тинимсиз Надеждиннинг сўзини бўлишга интилиб, гапларини баланд бақириб инкор қилишди. Шу вақт студиядан «Сиз бу режани кўрдингизми?» деган савол тушди. «Тинчланинг, ҳаммаси шундайлиги кўриниб турибди», деди собиқ депутат сўзидан тўхтамай.

«Ҳа, фронтнинг Запорижжя ва бошқа ерларида олдинга силжиш бордир, лекин бунинг эвазига нима олинди? Бутунлай яксон бўлган Украина шаҳарлари. Мариупол йўқ бўлиб кетди ҳисоб, Грознийга ўхшаб. Миллионлаб украиналиклар қочоққа айланди, Россияга ҳам миллионлаб қочоқлар келишди. Бир сўз билан айтганда улкан гуманитар даҳшат юзага келди.

Кейин-чи? Шартнома асосида хизмат қиладиганлар ва росгвардиячилар билан эплаб бўлмаслиги ойдинлашгач, минглаб маҳбуслар йиғиб олинди. Путин бошидан бу арзимаган «махсус ҳарбий амалиёт» эканига ишонтирмоқчи бўлади, аммо янги йилда у одамларга табрик йўллар экан, бутун бошли катта урушнинг ҳарбий қўмондони каби атрофида ҳарбийлар билан мурожаат қилди.

Ҳаммаси нима билан тугайди? Ҳеч ким билмайди. Шахсан мен Украина Россияни эгаллаши, Кремл қамал қилиниб, Путин қочиб кетишига ишонмайман. Аммо Россия армияси куч билан Киевни эгаллашига ишона оламан. Қандай қилиб дейсизми? Бу учун, ўртоқ Z-патриотлар, Украинанинг миллион кишилик армиясини енгиш учун тўлиқ сафарбарлик эълон қилиш керак. Бир неча миллион рус эркакларини қуроллантириш, мамлакатдан чиқишни тақиқлаб, бутун иқтисодиётни урушга қаратиш керак.

Ва буларнинг барчаси ёрдамида ғолиб чиқсангиз ҳам қўлга киритадиганингиз Киев, Мариупол каби йирик шаҳарларнинг харобага айланиши ва юз минглаб одамларнинг ўлими бўлади. Сиз шуни хоҳлаяпсизми? Ҳа, ғалаба қозониш мумкин, лекин даҳшатли вайронкорлик ва катта йўқотишлар билан. Гап шундаки ўртоқлар, у ерлардаги миллионлаб украиналиклар ҳозир нафақат Путинни, сизни ва бизни ҳам ёмон кўради. Сизга шу керакмиди?» деди Надеждин. “Замин” янгиликларини “Telegram”да кузатиб боринг