Туркманистон пойтахтидаги “Арқадағ” меҳмонхонасида 26 февраль куни мамлакат президенти Сердар Бердимуҳамедовнинг ўғли Керимғули Бердимуҳамедовнинг никоҳ тўйи бўлиб ўтди. Бу ҳақда “Хроника Туркманистана” мухбирлари хабар берди.
Маросим сабабли Туркманбоши, Гарашсизлик, Битараплик ва Арчабил кўчалари тўсиб қўйилган. Полиция ходимлари шаҳарда, шунингдек, Чўғанлига олиб борувчи катта йўл бўйлаб навбатчилик қилган. Туркман урф-одатларига кўра, Керимғулининг ота-онаси ва бувиси Оғулгерек Бердимуҳамедова қизга совчиликка борган. Келинга рўмол ўраб, тақинчоқлар беришган. Совчилар Херрикгала қишлоғига келгунига қадар келиннинг қўшниларидан кечгача уйларини тарк этиш сўралган.
26 февраль куни келинни Чўғонлидан олиб келишган, у ерда қизнинг оиласига янги коттеж берилган. Воқеа гувоҳлари кортеж 10 та машинадан иборатлигини санаган. Керимғули Бердимуҳамедов отаси ва бобоси билан давлат телевидениеси хабарларида тез-тез намойиш этилади. У бобоси, Туркманистон собиқ президенти Гурбангули Бердимуҳамедов билан бирга шеър ва мусиқа ёзиши билан машҳур. Бундан ташқари, улар тез-тез спорт билан шуғулланади ва биргаликда дам олади.
“Замин” янгиликларини “Telegram”да кузатиб боринг
