Фото: Reuters
Қўлга олинганлар Полшада қўпорувчилик ҳаракатларини тайёрлашда гумон қилинмоқда. Улар темирйўлларда ва Украинага қурол етказиб беришда фойдаланиладиган аэропорт ҳудудида яширин камералар ўрнатган.
Полшада Ички хавфсизлик агентлиги ходимлари олти кишини Россия фойдасига жосуслик қилганликда гумон қилиб қўлга олди, деб хабар берди Полшанинг RMF FM радиостанцияси 15 март, чоршанба куни. Ҳибсга олинганлар ҳақидаги маълумот кейинчалик Полша ҳукумати вакиллари томонидан тасдиқланди.
Радиостанция маълумотларига кўра, қўлга олинганларнинг барчаси «шарқий чегарадан келган хорижликлар» бўлиб, Россия махсус хизматларида ишлаган. Муҳим темирйўл кесишмаларида поездлар ҳаракатини ёзиб олган ва маълумотларни интернетга узатган яширин камералар аниқлангач, гумондорлар қўлга олинди.
Журналистларнинг сўзларига кўра, гап ўнлаб шундай камералар ҳақида кетмоқда. Улар асосан Подкарпак воеводелигидаги темирйўлларда ва Украинага Ғарб қуролларини етказиб беришда фаол фойдаланиладиган Жешув-Ясенка аэропорти ҳудудида ўрнатилган.
Британиянинг ВВС медиа-компаниясининг рус хизматига кўра, ушбу аэропорт шу қадар муҳим саналадики, АҚШ армияси уни ҳимоя қилиш учун Patriot ҳаво мудофаа мосламаларини жойлаштирган. Айнан шу аэропортга АҚШ президенти Жо Байден учиб келди, кейин у Киевга ташриф буюрди.
Полша ҳарбий контрразведка хизмати (SKW) собиқ раҳбари ўринбосари, полковник Мацей Матисякнинг сўзларига кўра, Россия махсус хизматлари камералардан асосан Украинага қурол-яроғ етказиб берилгани ҳақида маълумот йиғиш учун фойдаланган. Шу билан бирга, у руслар қўлга киритилган маълумотлардан қўпорувчилик уюштириш учун фойдаланиши мумкинлигини истисно этмади.
«Ушбу маълумотлардан қарши чоралар, жумладан, қўпорувчилик, саботаж, йўқ қилиш каби чораларни кўриш учун фойдаланиш мумкин. Руслар буни қилган, қиляпти ва қилади. Биз ҳаммамиз Чехиядаги ўқ-дорилар заводига ҳужумни кўрдик», - дея тушунтирди Матисяк.
Декабрь ойи охирида Германия Федерал разведка хизмати раҳбари Бруно Кал ўз разведка хизмати сафида россиялик жосус фош этилганини эълон қилди. Январь ойи охирида ушбу россияликнинг шериги ҳибсга олингани ҳақида маълум бўлди. Шунингдек, январь ойида Стокҳолм суди икки Швеция фуқаросини Россия фойдасига жосусликда айбдор деб топиб, улардан бирини умрбод қамоқ жазосига ҳукм қилди.
“Замин” янгиликларини “Telegram”да кузатиб боринг
