Италия ҳукумати март ойида уй қамоғидан қочган Красноярск ўлкаси собиқ губернатори ўғли, тадбиркор Артем Усснинг активларини музлатиб қўйди. Бу ҳақда 21 апрель, жума куни Il Messaggero газетаси мамлакат иқтисодиёт ва молия вазири Жанкарло Жоржеттининг фармонига таяниб хабар берди.
Нашр маълумотларига кўра, музлатилган активлар қаторига Милан яқинидаги Базильода вилла ва гараж, Banco di Sardegna банкидаги 160 минг евродан ортиқ маблағ ва Luxury Sardinia акцияларининг 40 фоиздан ортиғи киради.
Артем Усс 2022 йил октябр ойида АҚШ расмийларининг илтимосига биноан Милан аэропортида қўлга олинган эди. Қўшма Штатлар уни Америка ҳарбий технологияларини ноқонуний экспорт қилиш ва пул ювишда айблади. Усс ишида Германияда ҳибсга олинган унинг бизнес шериги Юрий Орехов ва яна уч нафар россиялик иштирок этмоқда.
Экстрадиция қилиш имкониятини кўриб чиққан Италия суди АҚШ расмийлари томонидан Уссга қўйилган айбловларнинг иккитасини етарлича ишончли деб топди: эмбаргони четлаб ўтиш учун Венесуэла нефтини контрабанда қилиш ва банк фирибгарлиги.
Россия ҳам Артем Уссни экстрадиция қилиш талаби билан Италияга мурожаат қилди. Москванинг Мешчанск суди уни жуда катта миқдордаги пул ювиш иши бўйича сиртдан ҳибсга олди.
АҚШга экстрадиция қилиш қароридан икки кун ўтиб, 22 март куни 40 ёшли эркак электрон билагузугини синдириб, уй қамоғида бўлган квартирани тарк этди. 12 апрель куни La Repubblica газетаси, унинг маълумотларига кўра, Усснинг қочиши камида ўн кишидан иборат бўлган тезкор гуруҳ томонидан уюштирилгани ҳақида хабар берди.
Терговга маълум бўлишича, бу одамлар Уссга Миландан Италиянинг Триеста шаҳрига бир неча соат ичида етиб боришга ёрдам беришган ва йўлда бир нечта машинани алмаштирган. У ерда Усс сохта ҳужжатлар ёрдамида Словения чегарасини кесиб ўтган, шундан сўнг у Сербияга кетган ва, эҳтимол, у ердан Россияга йўл олган.
“Замин” янгиликларини “Telegram”да кузатиб боринг
