Украина разведкаси бош бошқармаси (УРББ) кўплаб рус тарғиботчиларини «жазолашга» муваффақ бўлди. Бу ҳақда бошқарма бошлиғи Кирилл Буданов «Разные люди» лойиҳасига берган интервьюсида маълум қилди. Шунингдек, у «Вагнер» раҳбари Евгений Пригожин ҳақиқатни гапираётганини, Александр Лукашенко эса россияликларни Беларус ҳудудидан ҳужум қилишига қарши курашаётганини айтди.
«Улар кимнинг нишонлари?»
«Разные люди» лойиҳаси раҳбари Валерий Савчук Кирилл Будановдан россиялик медиа шахсларга уюштирилган суиқасдлар ҳақида сўради. «Соловёв, Дугин, Симонян - улар кимнинг нишони?» деди у.
«Уларнинг кўпчилигини аллақачон «жазоладик». Шундай ҳолатлар борки, дарҳол оммага аён бўлмоқда. Уларнинг кўпчилигини «жазолаганмиз»...» деди Буданов.
УРББ раҳбари ўз ходимларининг ёзувчи, «ЛХР» қуролли тузилмаларининг фаол тарафдори Захар Прилепиннинг ҳаётига суиқасд қилинишига алоқаси борлигига аниқлик киритмади.
«Агар сиз шахслар ҳақида сўрасангиз, мен ҳар қандай жаҳон разведкаси каби анъанавий тарзда жавоб беришим керак: биз бу ҳолатга изоҳ бера олмаймиз, маълумотни тасдиқламаймиз, инкор ҳам қилмаймиз», деди Буданов.
2022 йил 20 август куни Москва вилоятида файласуф ва «рус дунёси» мафкурачиси Александр Дугиннинг қизи Даря Дугинанинг машинаси портлаб кетди. Кейинчалик, Кирилл Буданов Даря Дугинанинг ўлдирилишига алоқадорлиги ҳақидаги саволга жавоб берар экан, ўзининг ходимлари Украинанинг тўлиқ ғалабасига қадар дунёнинг исталган нуқтасида русларни ўлдирганини ва ўлдиришга тайёрлигини айтди. АҚШ Давлат департаменти бу баёнотни танқид қилди.
2023 йил 2 апрелида тарғиботчи Владлен Татарский Санкт-Петербургдаги кафеда ҳалок бўлди. Унинг қўлида Даря Трепова совға қилган ҳайкалча портлаб кетди.
2023 йил 6 май куни Нижний Новгород вилоятида Захар Прилепиннинг машинаси портлаб кетди. Дастлабки маълумотларга кўра, номаълум шахс «Рус дунёси»нинг фаол тарафдори автомобили ҳаракатланадиган йўналишга мина ўрнатган. Прилепин жароҳат олди, унинг ҳайдовчиси вафот этди. Қотилликда гумон қилиниб, Нижний Новгород шаҳрида яшовчи Александр Пермяков ва яна бир эркак қўлга олинди. Пермяков гўёки Украина махсус хизматлари кўрсатмаси бўйича ишлагани, йўлга бомба ўрнатгани ва уни масофадан туриб портлатганини тан олди.
Украина расмийлари суиқасдда россиялик партизанлар иштирок этганини бир неча бор таъкидлади. Аммо Кирилл Буданов ўз интервьюсида Россияда бирлашган партизан ташкилоти йўқлигини айтди.
«Пригожин сўзларининг аксарияти тўғри»
УРББ раҳбари Евгений Пригожин томонидан ташкил этилган «Вагнер» хусусий ҳарбий компанияси Россиянинг мунтазам армиясидан кўра кўпроқ самарадорлик кўрсатганини айтди.
Кирилл Буданов сўзларига кўра, Пригожин қўллаб-қувватлаш ва снарядлар етишмаслиги ҳақида гапирганида алдамаган.
«Бу Мудофаа вазирлиги расмийларининг ҳасади туфайли», деб баҳолади у «Вагнер» билан боғлиқ вазиятни.
«Энг қўрқинчлиси - Пригожин айтган гапларнинг кўп ҳолларда ҳақиқат экани. Унинг 80 фоиз гапи ҳақиқат», деди Буданов.
2023 йил 16 март куни The Washington Post (WP) газетаси Евгений Пригожиннинг Украина разведкаси билан алоқаси ҳақида хабар берди. Жумладан, «Вагнер» асосчиси украиналикларга Бахмутни тарк этишни, эвазига рус қўшинларининг позициялари ҳақида маълумот беришини айтган.
Нашр қўлга киритган ҳужжатларга кўра, «вагнерчилар» бошлиғи гўёки Африка давлатларидан бирида Украина разведкаси ходимлари билан учрашган ва уларга Россия қўшинларининг руҳияти пастлиги фонида Қрим томон юришни маслаҳат берган.
Кремль WP хабарига изоҳ беришдан бош тортди. Владимир Зеленский журналистларнинг бу борадаги саволларига жавоб беришдан қочди. Евгений Пригожин Россия қўшинларининг жойлашуви ҳақидаги маълумотларнинг аҳамияти йўқлигини, чунки буни сунъий йўлдош тасвирларидан кузатиш мумкинлигини айтди. Кейинчалик у аскарлар жасадини алмашиш мақсадида Кирилл Буданов билан алоқада эканини тан олди.
«Лукашенко аҳмоқ эмас»
Шунингдек, Кирилл Буданов Украина қўшинлари россияликларни чалғитишга муваффақ бўлганини айтди. Унинг сўзларига кўра, энди бу украиналикларга Қуролли кучларнинг қарши ҳужумга оид режасини аниқ тушунтиришдан кўра муҳимроқ. УРББ раҳбари, шунингдек, Россия Қуролли кучлари ўз позицияларини ҳимоя қилишга яхши тайёргарлик кўрганини тан олди.
«Аммо Россия энди жиддий ҳужум операцияларини амалга оширишга қодир эмас», деди у.
Буданов шунингдек, Беларусдан рус қўшинларининг ҳужуми такрорланишини кутмаслигини айтди. Унинг сўзларига кўра, УРББ барча усулларни ишга солиб, жумладан, Олий Рада депутатларидан фойдаланган Беларус ҳукумати билан мулоқот қилган.
«Лукашенко, биз уни ёқтирамизми ёки йўқми, аҳмоқ эмас. У 24 февралдаги вазиятнинг такрорланишига биринчилардан бўлиб йўл қўймоқчи эмас», деди Буданов.
“Замин” янгиликларини “Telegram”да кузатиб боринг
