Россия томонида жанг қилган қирғизистонлик узоқ йилга қамалди

Бишкекнинг Первомай туман суди Украинада жанг қилган қирғизистонликни ёлланма аскарлик - бошқа давлатларнинг қуролли можароларида қатнашгани учун 10 йилга озодликдан маҳрум қилди. Бу ҳақда Олий суд маълумотлар базасида эълон қилинган суд ҳукмида маълум қилинган.

Ҳужжатда қайд этилишича, 2022 йил июнь ойида 30 ёшли судланувчи Россия фуқаролигини олиш учун ўзини ўзи эълон қилган Луганск Халқ Республикасининг қуролли гуруҳларига қўшилган. Ўтган йилнинг июль ойида Қирғизистон фуқароси Брянка шаҳрига келган ва 180 минг рубль маош билан жанговар машина командири ўринбосари лавозимига тайинланган.

Ҳужжатга кўра, қирғизистонлик Соледар шаҳридаги фронт чизиғига миномёт ва ўқ-дориларни етказиб турган. Бироқ, сентябр ойида у Попасная шаҳрига кўчирилган, у ерда миномётлардан ташқари, “ЛХР” ҳарбий гуруҳларини моддий таъминлаш, шу жумладан озиқ-овқат ва кийим-кечак етказиб бериш билан шуғулланган.

Қирғизистонлик ҳарбий хизматдан 2022 йил ноябридаги ҳисоботга кўра бўшатилган. Шундан сўнг у Москвага бориб, у ердан ватанига қайтиб келган.

Судланувчи ўзига қўйилган айбларни тан олмаган. Унинг айтишича, у «фақат ЛХР ҳудудида» бўлган ва у ҳеч қачон жанговар ҳаракатларда қатнашмаган, бутун хизмат муддатини ҳарбий рўйхатга олиш идорасида ўтказган.

Айбланувчи судда касал отасига қараш учун ватанига қайтганини ва шу сабабли ўзи истеъфога чиқиш аризасини ёзганини айтган.

12 январь куни Қирғизистон Миллий хавфсизлик давлат қўмитаси ходимлари мазкур шахсни Украина ҳудудидаги ҳарбий амалиётларда қатнашганликда гумон қилиб қўлга олгани хабар қилинган эди. Бироқ ўшанда Миллий хавфсизлик давлат қўмитаси қирғизистонлик қайси давлат учун жанг қилганига аниқлик киритмаган.

Жиноят кодексига кўра, қирғизистонликларга бошқа давлатларнинг ҳарбий можароларида қатнашиши тақиқланган. Қонунни бузиш 15 йилгача озодликдан маҳрум қилиш кўзда тутилган.

Шухрат Раззаков

«ЗАМИН.УЗ» муҳаррири