Россия ҳукумати америкалик сенаторни қидирувга берди. Аслида нима бўлган?

Россия ИВВ америкалик сенатор Линдси Грэмни қидирувга берди. Бунга сиёсатчи гўёки россияликларнинг Украинадаги урушда ҳалок бўлишини Америка пулларининг муваффақиятли сарфланиши деб баҳолагани айтилган видео сабаб бўлган. Reuters агентлиги аниқлашича, аслида у бундай гап айтмаган.

26 май куни республикачи сенатор Линдси Грэм Киевга келди ва Украина президенти Володимир Зеленский билан учрашди. Шундан сўнг Зеленскийнинг офиси учрашувдан видеоёзув эълон қилди, ундан сенатор россияликлар урушда ўлаётгани ва бу «америкаликлар пул сарфлаган энг яхши иш» ҳисобланишини айтгани ҳақида хулосага келиш мумкин.

Бу видеоёзув Россияда қизғин реакция келтириб чиқарди. Хавфсизлик кенгаши раиси ўринбосари Дмитрий Медведев Грэмни «қари аҳмоқ» деб атади ва «унинг севимли Америкаси нафақат оддий одамларни ўлдиришга, балки сенаторларни ўлдиришга ҳам мунтазам равишда ҳаром пулларни сарфлаб келгани»ни қўшимча қилган.

«Мамлакатга бундай сенаторлардан ортиқ шармандаликни тасаввур қилиш қийин», дея бунга муносабат билдирган Россия президенти матбуот котиби Дмитрий Песков.

Ўз навбатида, Россия ТИВ расмий вакили Мария Захарова «АҚШнинг инвестицияларидан бири Иккинчи жаҳон уруши ва Холокостга олиб келгани», энди эса «Американинг миллиардлаб долларлари неонацист Киев режимининг тўймас жиғилдонига тўкилаётгани»ни таъкидлаган.

Россия Тергов қўмитаси раҳбари Александр Бастрикин «америкалик сенаторнинг русофоб баёнотлари факти бўйича» жиноий иш очишга топшириқ берган.

Душанба куни тонгда ИИВ базасида Линдс Грэмнинг карточкаси пайдо бўлди, ундан сенатор жиноий модда бўйича қидирувга берилганини англаш мумкин.

Аммо якшанба куни кечқуруноқ Reuters агентлиги мулоқотнинг Зеленскийнинг офиси томонидан тақдим этилган тўлиқ видеоёзувини ўрганиб чиққани ва «россияликлар ўлмоқда» ва «биз пул сарфлаётган энг яхши нарса» иборалари кетма-кет келмаганини аниқлагани ҳақида хабар берганди.

Кейинроқ тўлиқ видео ҳам тарқалди ва унда суҳбат шундай кечади:

Грэм: Бизда ҳам шундай пайтлар бўлган, охиригача курашганмиз, озод бўлиш ёки ўлишни танлаганмиз.

Зеленский: Энди эса сиз озодсиз. Ва биз ҳам [озод] бўламиз.

Грэм: Россияликлар эса ўлишмоқда.

Зеленский: Ҳа, аммо улар бизнинг ҳудудимизга келишди. Биз уларнинг ҳудудида жанг қилаётганимиз йўқ.

Грэмнинг ўша ибораси (америкаликларнинг пуллари энг яхши сарфланиши ҳақидаги), Россия пропагандаси томонидан «руслар ўлими учун инвестиция» сифатида тақдим этилган сўзлар алоҳида айтилган ва видеода бутунлай бошқа жойда келади.

Сенаторнинг «энг яхши инвестиция» ҳақидаги сўзлари аслида видеомонтаждаги каби «руслар ўлаётгани» ҳақидаги сўзларидан кейин эмас, олдин айтилган.

Унинг «бу бизнинг энг яхши инвестициямиз» деган сўзлари эса, руслар ўлимига тааллуқли эмас, балки ҳарбий ёрдам ҳажми ҳақида эди.

Грэмнинг ўзи агентликка маълум қилишича, Зеленский билан учрашувда Украина ҳам АҚШ каби «эркин яшаш ёки ўлим» принципи бўйича яшашини ва «Украинани россиялик ҳарбий жиноятчилардан озод этишга ёрдам бериш АҚШ учун яхши инвестицияга айлангани»ни айтган.

Шунингдек, Грэм «одатдагидек, Россия пропаганда машинасининг буғи тугаб бораётгани»ни таъкидлаган ва Россия Хавфсизлик кенгаши раиси ўринбосари Дмитрий Медведевга алоҳида мурожаат қилган.

«Жаноб Медведев, агар россияликлар Украинада ўлиши тўхташини истасангиз, қўшинларни олиб чиқинг. Босқинни тўхтатинг. Ҳарбий жиноятларни тўхтатинг. Аммо ҳақиқат шуки, сизга ҳам, Путинга ҳам россиялик аскарларнинг жони қадрсиз», деган у.

Россия ҳукумати америкалик сенаторни қандай йўл билан қидириши ва қўлга олмоқчи экани номаълум. Грэмнинг ўзи Россияга кела олмайди, чунки унга нисбатан персонал санкциялар қўлланган.

Шухрат Раззаков

«ЗАМИН.УЗ» муҳаррири