Буюк Британия мудофаа вазири Бен Уоллеснинг ҳисоблашича, Россия 2014 йилда аннексия қилиб олган Қримни шу йилнинг ўзидаёқ қайтариб олиш учун Украинада имкониятлар етарли. Бу ҳақда у The Washington Post нашрига берган интервюсида айтиб ўтган.
«Жанг майдонида гувоҳ бўлганимиздек — агар сиз Россия қўшинларига кутилмаган жойда зарба берсангиз, улар амалда ҳалокатга учрайди. Сиз ўн минглаб ёш йигитларни ўлимга юборишингиз мумкин, улар чиндан ҳам ўлишади, аммо сиз танк ва қурол тизимларини сеҳрлай олмаймиз», — деган Уоллес.
Вазирнинг фикрича, россияликларнинг йўқотишлари кўлами шундан гувоҳлик берадики, Россия президенти Владимир Путин ҳамон агар Украинага янада кўпроқ қўшин юборса, ғалаба қозониши мумкинлигига ишонмоқда.
Уоллес Путин бўлаётган воқеалар тўғрисида аниқ маълумот олмаётган ва ўз мамлакатининг ҳарбий муаммолари кўламини англамаётган бўлиши мумкинлигини тахмин қилган. У Ғарб давлатлари Россияда «ҳалокат ва парчаланиш» рўй беришига тайёр туриши лозимлигини таъкидлаган.
Британия вазири Украинанинг НАТОга кириши эҳтимолини ҳам баҳолаган. У бу масалада ҳали ҳам зид қарашлар сақланиб қолаётганини қайд этган.
«Биз реалист бўлишимиз ва Вилнюсда [НАТО мамлакатларининг 2023 йилги саммитида] бу содир бўлмаслиги, буни яқин вақтлар ичида кутиш керак эмаслигини айтишмиз керак», — деган Уоллес.
- Украина ҳукумати бир неча бор Россия билан уруш рус қўшинлари босиб олинган барча ҳудудлардан чиқиб кетиб, Украинанинг халқаро тан олинган чегаралари тикланганида, жумладан, Қрим ҳам қайтарилганидан кейингина тўхташи мумкинлигини билдирган.
- 2023 йил апрелида Украина президенти офиси раҳбари ўринбосари Ондрий Сибига Украина қуролли кучлари қарши ҳужумида Қрим чегараларига қадар етиб борилса, Киев яриморолнинг қайтарилиши шартлари бўйича Москва билан музокаралар олиб боришга тайёрлигини айтганди.
