АҚШ разведкаси “Вагнер” раҳбари Евгений Пригожиннинг қисқа муддатли исёни олдидан режалари, жумладан “Вагнер” қаерда ва қандай олдинга силжишни режалаштиргани ҳақида маълумотларни тўплашга муваффақ бўлган. Бу ҳақда аноним манбаларга таяниб, CNN хабар берди.
Аммо разведка маълумотлари шу қадар сир сақланганки, у НАТО даражасида эмас, балки фақат танланган иттифоқчилар, жумладан, Британиянинг юқори мартабали амалдорлари билан бўлишилган.
Пригожиннинг айнан қачон ҳаракат қилиши аниқ бўлмаган, дейди манбалар. Аммо у 10 июнь куни Россия Мудофаа вазирлигининг барча хусусий ҳарбий компаниялар, жумладан “Вагнер” ҳам Россия армияси билан шартномалар имзолашга мажбур бўлиши ҳақидаги эълонидан кейин ўз режасини илгари сурган кўринади.
Разведка шу қадар сир эдики, АҚШда у фақат энг юқори мартабали маъмурият амалдорларига, шунингдек, разведка билан боғлиқ энг нозик масалаларга кириш ҳуқуқига эга бўлган Конгресснинг Саккизлик гуруҳи аъзоларига маълум қилинган.
Разведка маълумотлари сирлиги шундан иборатки, баъзи юқори мартабали европалик ва АҚШ ҳукуматидаги амалдорлар ҳам Пригожиннинг ҳужумидан эҳтиёт бўлган.
Баъзи НАТО расмийлари разведка маълумотлари ошкор этилмаганидан норозилик билдирган.
“Аммо маълумотларни очиқлаш ўта нозик манбалар ва усулларни хавф остига қўйган бўларди. Украина расмийларига ҳам разведка ҳақида олдиндан айтилмаган. Бу АҚШ ва Украина расмийлари ўртасидаги суҳбатлар душманлар томонидан тингланиши мумкинлигидан қўрқиш билан боғлиқ”, — дея тушунтиради манбалар.
Исёндан кейин Байден иттифоқчилар, жумладан Франция, Германия, Буюк Британия ва Канада раҳбарлари, шунингдек, Украина президенти Владимир Зеленский билан гаплашган. Ўша суҳбатлар чоғида АҚШ разведкасига маълум бўлган нарсаларни яхшироқ тушунишни таъминлаш учун исён ҳақидаги разведка маълумотлари очиқланган.
Пригожин исёни ўз-ўзидан пайдо бўлмаган. АҚШ расмийлари унинг Россия Мудофаа вазирлиги билан давом этаётган низосини бир неча ой давомида кузатган ва иккаласи ўртасидаги таҳдидлар алмашинувига эътибор қаратган. Шунингдек, “Вагнер” исён олдидан қурол ва ўқ-дориларни жамғараётгани ҳақида ҳам маълумотлар бор эди.
“Ўн йил аввал Путин бундай ўйиннинг кечишига йўл қўймаган бўларди. Бу Путин аниқ заифлашганини англатади”, — дейди Виржиния штатидан демократ сенатор, разведка қўмитасининг раиси аъзоси Марк Уорнер.
Пригожин истеъфога чиқишидан олдин, Украина расмийларига турли даражадаги иттифоқчилар мурожаат қилиб, уларни Россия ичидаги тартибсизликдан фойдаланиб, зарба беришдан воз кечиш ҳақида огоҳлантирган, дейди Ғарб расмийси.
Хавотир шундан иборат эдики, Украина ва Ғарб Пригожинга ёрдам бериб, Россия суверенитетига таҳдид солаётгандек кўриларди.
«Замин» янгиликларини «Вконтакти»да кузатиб боринг
