12 июль, чоршанба куни «Проект» нашри «Вагнер» ХҲК эгаси Евгений Пригожиннинг «жиноий ва психологик портрети»ни эълон қилди. «Ўнлаб йиллар давомида шафқатсиз, назоратсиз Пригожин давлатнинг кўплаб қонунларини бузди ва бунинг учун ҳеч қандай жазога тортилмади», - деб ёзади муаллифлар «Кремл ошпази»нинг ўнлаб танишлари ва ходимларига таяниб.
Журналистлар Пригожин томонидан уюштирилган исён қандай содир бўлганини таҳлил қилишга уриниб кўрди. «Кремл ошпази» билан узоқ вақт ишлаганларнинг фикрича, унинг сўнгги пайтларда хатти-ҳаракатларига касаллик оқибатлари сабаб бўлган – у узоқ вақт давомида қорин бўшлиғи саратонидан даволанган ва жиддий терапиядан ўтган, дея таъкидлайди нашр.
«Бу одамнинг қорни ва ичаклари кесилган!» - дея Пригожиннинг ходимларидан бири нима учун у қуролли исён каби радикал қадам ташлаганини тушунтириш сўровига шундай муносабат билдирди. «Проект» суҳбатдошлари, хусусан, содир бўлган воқеаларни унинг импульсив табиати билан боғлашга мойиллигини айтди. «Вагнер» ХҲК эгасига яқин манбага кўра, Пригожин ўзининг яқин ҳамкорларига воқеани «Жазавага тушиш» сўзлари билан тушунтирган. Аммо бу версияда ҳамма нарса унчалик оддий эмас, дейди тадқиқот муаллифлари.
Расмий сабаб Мудофаа вазирлигининг 10 июнь куни «Вагнер» жангчилари Россия армияси билан шартнома имзолаши кераклиги ҳақидаги баёноти бўлди. Шу билан бирга, Пригожин ҳамда Шойгу ва Россия ҳарбий идораси ўртасидаги зиддият Украинадаги урушдан анча олдин бошланган. Бу «камида 2017 йилдан бери» давом этмоқди, деб ёзади «Проект».
«Пригожин Шойгу ва унинг генералларини 2017 йилда Сурия Палмирасига иккинчи ҳужумда барча ютуқларни қўлга киритганини кечира олмади, аммо унда «Вагнер» ХҲК ҳам иштирок этганди. Шундан сўнг тўқнашувлар вақти-вақти билан такрорланиб турди, 2021 йилда Пригожин ҳатто Шойгу музокаралар учун юборган генераллардан бирини ургани ҳақида гап-сўзлар тарқалган».
«Проект» исён ўз-ўзидан содир бўлиши эҳтимолдан йироқ эмаслигини билдирган. Унинг «медиа томонидан қўллаб-қувватланиши олдиндан тайёрланган. Пригожиннинг РИА ФАН нашри деярли бир ой ўтиб сайтнинг нусхаларини рўйхатдан ўтказган ва исён бўлган куни нинг журналисти Ростовда гўё тасодифан пайдо бўлган, деб ёзади муаллифлар.
Бундан ташқари, 23 июнь куни эрталаб, «исён бошланишидан ярим кун олдин, Пригожин тузилмаларининг бир нечта топ-менежерлари Санкт-Петербургни тарк этди». «Фабрика раҳбарияти ҳамма нарсани билган ва тинтувлар ўтказилишини кутган», деди журналистларга «Проект» суҳбатдошларидан бири.
“Замин” янгиликларини “Twitter”да кузатиб боринг
