2023 йилнинг 3-10 июль кунлари дунё бўйлаб энг иссиқ ҳафта қайд этилди. Бу ҳақда The Guardian хабар берди.
Метеорологларнинг айтишича, бу ҳарорат кўтарилишининг охири эмас. Aтмосферадаги карбонат ангидрид миқдорининг кескин ошиши аллақачон Техас штатида (АҚШ), шунингдек, Греция, Испания, Италия ва бошқа кўплаб мамлакатларда жазирама тўлқинларни келтириб чиқарган.
Европа бўйлаб об-ҳавонинг “қизил” даражасидаги огоҳлантиришлар эълон қилинган; Хорватия, Адриатика денгиси соҳиллари ва Испания Наваррасида ўрмон ёнғинлари давом этмоқда. Акропол каби сайёҳлик объектлари ҳаво ҳарорати 40 даражагача кўтарилгани сабабли ёпилган.
Жаҳон метеорология ташкилоти 1850 йилларда ҳаво ҳароратини инструментал ўлчаш бошланганидан бери Ер бундай аномал иссиқликни сезмаганини маълум қилди.
Олимларнинг огоҳлантиришича, бу йил ёки келгуси йилда глобал ҳарорат Цельсий бўйича 1,5 даражадан ошиб кетиши мумкин.
Тез орада содир бўладиган янги рекорд иссиқлик тўлқинининг оқибатлари чуқур ва хавфли бўлади. Ўтган ёзда Европа бўйлаб ҳаво ҳароратининг кескин кўтарилиши оқибатида 61 мингдан ортиқ одам ҳалок бўлган.
Бирлашган Миллатлар Ташкилоти Бош котиби Антониу Гутерришнинг сўзларига кўра, “иқлим ўзгариши назоратдан чиқиб кетмоқда. Унинг огоҳлантиришича, агар дунё қазиб олинадиган ёқилғи чиқиндиларини чеклаш учун зарур бўлган асосий чора-тадбирларни кечиктиришда давом этса, бу “ҳалокатли вазият”га олиб келиши мумкин.
“Замин” янгиликларини “Twitter”да кузатиб боринг
