Эронда ҳижоб ўрашдан бош тортган аёллар ишдан ҳайдалиб, машиналари бўлса, мусодара қилинади. Бу ҳақда The Times хабар берди.
Халқаро Amnesty International инсон ҳуқуқлари ташкилотига кўра, Эрон полицияси қонунга бўйсунмаган аёлларни машинаси олиб қўйилишидан огоҳлантиради. Ҳозиргача 133 100 дан ортиқ аёл шундай хабар олган. Полиция ходимлари 2 000 та машинани мусодара қилган.
16 июль куни полиция ҳижоб ўраганликни текширадиган патрул хизмати тикланишини эълон қилди. Жамоат жойларида қонунни бузган аёллар жавобгарликка тортилиши ҳақида огоҳлантирилган.
Айрим хотин-қизларнинг худди шу сабабга кўра университетлардан вақтинча ёки доимий четлаштирилаётгани, имтиҳон топширишга рухсат берилмагани, жамоат транспорти ва банк хизматларидан фойдаланиши тақиқлангани маълум.
Айни пайтда Эронда ҳижобни мажбурий деб ҳисобламаган юзлаб корхоналар ёпилди.
Ҳижобсиз аёллар “ақлли камералар” ёрдамида топилади
Апрель ойи бошида Эрон полицияси жамоат жойларига “ақлли камералар” ўрнатишни бошлагани маълум бўлди. Reuters хабарига кўра, бундай қурилмалар Эрон полициясига боши очиқ аёлларни аниқлаш имконини беради. Шундан сўнг “қоидабузарларга бунинг оқибати ҳақида огоҳлантирувчи матнли хабарлар” келади. Эроннинг “Мизан” суд ахборот агентлиги хабарига кўра, бу ҳаракатлар “ҳижоб қонунига қаршилик кўрсатишнинг олдини олишга” қаратилган.
«Замин» янгиликларини «Вконтакти»да кузатиб боринг
