Трамп судга борди, айбини тан олмади ва голф клубига учиб кетди

^{Фото: Kyle Mazza/Keystone Press Agency/Global Look Press}

Суд эшитуви белгиланганидан 15 дақиқа кечроқ бошланди. Бу вақтда Трамп суд ҳужжатлари билан танишиб, адвокатлари билан гаплашиб олди. Жараён бошлангач, Трамп судя талаби билан қоидага кўра исми, фамилияси, ёшини айтди. Шунингдек, собиқ президент ҳеч қандай модда таъсирида эмаслигини ўз оғзи билан тасдиқлашга мажбур бўлди.

Прокурорлар Трамп суд мажлисига қадар ҳибсга олинмаслигини айтишди. Аммо ундан иш фактларини сир сақлаш ва Колумбия округи федерал судига кўрсатма бериш учун бориши сўралди. Судя бу талабларни бажармаслик ҳибсга олиш учун асос бўлиши, судга ҳурматсизлик деб баҳоланишини эслатди.

Трамп суддан чиқиб Роналд Рейган аэропортига борди, у ердан Ню-Жерсидаги голф-клубига учиб кетди. Парвоз олдидан мухбирларга кичик нутқ билан мурожаат қилган Трамп «Бугун Америка учун жуда қайғули кун экани»ни айтди. У ўзига қўйилган айбловлар «сиёсий рақибини таъқиб қилиш экани»ни иддао қилди.

Трампга қўйилаётган учинчи айблов бўйича навбатдаги йиғилиш 28 августда ўтказилиб, шу куни суд жараёни санаси эълон қилинади. Трампнинг суд иши бўйича биринчи эшитувда келиб чиқиши ҳиндистонлик бўлган магистрат-судя Моҳила Упадҳая раислик қилди. Суд жараёнида эса Барак Обама даврида тайинланган келиб чиқиши ямайкалик бўлган судя Таня Чуткан судялик қилади. Маълумот учун, федерал судялар орасида ишлар тасодифий тақсимланади.

Бу галги суд ишида Трампга нисбатан тўрт банддан иборат айблов илгари сурилган. Улар орасида АҚШни алдаш учун фитна уюштириш, гувоҳлар кўрсатмасини сохталаштириш ва инсон ҳуқуқларини бузишга қаратилган финта уюштириш каби айбловлар ҳам бор.

Ишни ўрганаётган махсус прокурор Жек Смит собиқ президент Трампни тўғридан тўғри Капитолийга ҳужумга айбламаяпти. Ваҳоланки ҳужумда гўёки сайловлар ноҳақ ўтганидан норози бўлган Трамп тарафдорлари иштирок этган.

Президентликдан кетганидан кейин Трамп Вашингтонга фақат бир марта борганди. Суд залидан чиқишида жуда кўп тарафдорлари уни кўриш иштиёқида кутиб туришганди. Айблов хулосасидан аввал Трамп унга нисбатан иш очилгани «Байден даврида АҚШ коррупцияга ўралашиб тамом бўлганидан далолат» эканини айтди.

Суд биноси атрофида Трампнинг кўп сонли тарафдорлари тўпланганди

Янги тартибсизликлар хавфи

Трампга нисбатан суд эшитувидан аввал пойтахт Вашингтонда хавфсизлик чоралари кучайтирилди. Федерал суд биноси атрофи темир тўсиқлар билан ўраб чиқилди. Жараёнда қатнашган судяларнинг хавфсизлиги ҳам оширилди.

Эшитув куни Трампни ҳимоя қилган махсус хизмат Вашингтонда тирбандлик кузатилишидан огоҳлантирди.

Суд биноси атрофида кўп сонли журналистлар ҳам ўз техникалари билан навбатчилик қилишди

Республикачиларнинг Трампга нисбатан муносабати

Шунча муаммолар гирдобида қолган бўлса-да, Трамп ҳамон республикачилар орасида президентликка номзодини илгари сурадиган асосий даъвогар бўлиб турибди. Шу сабаб республикачилар унинг атрофида бирлашишга мажбур. Улар АҚШ «бананли давлат»га айлангани, Трампга қарши ишлар очиқчасига президентлик сайловларига аралашув эканини айтишмоқда.

Трамп даврида вице-президент бўлган Майк Пенс ҳам келаси президентлик сайловларида ўз номзодини қўймоқчи. Унинг имкониятлари яхши эмас, лекин Пенс сайловолди дастурларидан бирида Трамп ҳақида шов-шувли гапни айтишга улгурди. Унинг сўзларига кўра, 2021 йил 6 январ куни (Капитолийга ҳужум вақтида) Трамп ва шерикларининг Байденга овоз берган сайловчилар ваколатларини қабул қилмаслик борасида босимига учмаслик орқали сиёсатчи сифатида ўз бурчини бажарган. Пенс Трамп каби одам ортиқ президент бўлмаслиги кераклигини айтганди.

«Афсуски президент атрофини унинг қулоқлари эшитишни хоҳлаган гапларни айтадиган аҳмоқ ҳуқуқшунослар ўраб олганди. Президент Конституцияни эмас, уни танлашимни талаб қилишда давом этди», деганди Пенс сайловчилар билан учрашувда.

Йиғилганларнинг барчаси ҳам - Трампнинг мухлислари эмасди. Уни қамоққа муносиб деб ҳисобловчилар ҳам топилади

Трампга нисбатан илгари сурилган бу галги 45 саҳифалик айбловга қисман Майк Пенс Капитолийга ҳужум куни амалга оширган Трамп билан ёзишмалари ҳам асос бўлган.

Бу Трампга нисбатан очилган учинчи жиноий иш ҳисобланади. Бунгача апрел ойида Трампга қарши махфий маълумотларни ноқонуний сақлаш, порноактрисага жим юриши учун пул тўлаш мақсадида молиявий ҳисобларни сохталаштириш айбловлари бўйича иш очилганди.

Шу ойда Жоржия штати прокуратураси Трампга қарши сайлов натижаларини ўзгартиришга уриниш айблови билан жиноий иш очиши мумкин. Бу президентлик сайловида иштирок этишни режалаштирган Трампга қарши очилган тўртинчи жиноий иш бўлади.

Янгиликлар