Блинкен Кулеба билан Жиддадаги музокара натижаларини муҳокама қилди

^{Фото: Reuters}

Вашингтонда бўлган АҚШ давлат котиби Энтони Блинкен Украина ташқи ишлар вазири Дмитрий Кулебага қўнғироқ қилиб, Украина қарши ҳужумини ривожлантириш, Жиддада Киев тинчлик режасини муҳокама қилиш натижалари, шунингдек, икки давлат ўртасида хавфсизлик соҳасидаги узоқ муддатли келишувларни муҳокама қилди, деб хабар бермоқда АҚШ Давлат департаменти матбуот хизмати.

«Давлат котиби АҚШ Украинанинг Россия агрессиясидан мудофаасини кучли ва доимий қўллаб-қувватлашини ҳамда кучли Украина армияси ва тегишли мудофаа институтларини ёлғиз ташлаб қўймаслигини яна бир бор тасдиқлади», — дейилади баёнотда.

Саудия Арабистонининг Жидда шаҳрида Украина бўйича музокарачилар маслаҳатлашувлардан сўнг икки масала бўйича келишувга эришди, дея хабар беради Corriere della Sera манбалари. Италия газетасининг ёзишича, барча ҳар қандай тинчлик битими «Украинанинг ҳудудий яхлитлиги ва суверенитетини ҳурмат қилиш» ва БМТ Низомининг устунлиги тамойилига амал қилиш асосида тузилиши керак, деб ҳисоблайди.

Томонлар Киев таклиф қилган Россия-Украина можаросини тартибга солиш режасини муҳокама қилиш учун ишчи гуруҳлар тузишга келишиб олди. Бу режа, бошқа нарсалар қатори, 1991 йилги чегаралар доирасида Украина ҳудудидан барча Россия қўшинларини олиб чиқиб кетиш, шунингдек, «адолатни қайтариш»ни назарда тутади.

Жиддада давлат раҳбарлари учрашувининг эҳтимолий санаси ҳам муҳокама қилинмоқда. Газетанинг манбаларига кўра, бундай саммит йил охиригача бўлиб ўтиши мумкин.

Янгиликлар