Қамоқхонадаги Стрелковнинг қўли ишламай қолаётгани айтилди

^{Фото: Коммерсантъ}

Россиялик ҳарбий, истеъфодаги ФСБ полковниги Игор Стрелковнинг (Гиркин) қамоқхонада қўли ишламай бошлаган. Бу ҳақда унинг хотини Мирослава Регинская хабар қилган.

Аёлнинг сўзларига кўра, қамоқхонада Стрелковнинг саломатлиги ёмонлашган, қўли ишламай бошлаган ва нафас олиши қийинлашган.

«Уни ҳалигача тиббий кўрикдан ўтказишмаган. Нега бундай қилишаётганидан ҳайратдаман. Буни эримни мазах қилиш деб тушунаман ва бундай ҳолатга рози бўлмоқчи эмасман», деган Регинская.

2014 йил Украина шарқидаги ҳарбий ҳаракатлар бошланишида асосий одамлардан бири бўлган Игор Стрелков 21 июл куни Москвада қўлга олинганди. Уни одамларни экстремизмга чорлашда айблаб қўлга олишган. Стрелков охирги вақтларда урушда етарлича кескин ҳаракат қилмаётгани учун Россия ҳукумати ва хусусан президент Путинни танқид қилиб келаётганди.

Стрелков «Новороссия» ҳаракатининг фаол вакилларидан бири ва Россиянинг Украинага босқинини қўллаб-қувватлайди. У 2014 йил ўзини ўзи мустақил деб эълон қилган «ДХР» мудофаа вазири бўлганини эълон қилганди. Стрелков 2022 йил февралда бошланган босқинда иштирок этишга ҳам уриниб кўрган, лекин унинг фронтга боришига рухсат беришмаганди.

Янгиликлар