Украинада 31-десант-штурм бригадаси командири, чақирув белгиси «Дунай» бўлган полковник Андрей Кондрашкин ҳалок бўлди. Бу ҳақда Росгвардия раҳбарининг «ДХР» бўйича ўринбосари Александр Ходаковский хабар берди.
У Кондрашкин билан Мариупол россиялик ҳарбийлар томонидан эгалланганида илк бор учрашгани ва дўст бўлиб қолганини эслаган.
«Бугун унинг ўлими ҳақидаги хабар қалбимизни қаттиқ яралади. Биз унинг оиласи ва яқинларига, қуролдошларига ҳамдардлик билдирамиз», — дея ёзган у.
Ходаковский Кондрашкиннинг ўлими тафсилотлари ва у айнан қаерда ҳалок бўлганига аниқлик киритмаган.
Украиналик журналист Юрий Бутусовнинг маълумотига кўра, 31-бригада уруш бошидан буён барча йирик жангларда, жумладан Киев яқинидаги Гостомел аэропортига десант тушириш амалиётида иштирок этган.
Унинг айтишича, ҳозирда бу бўлинма Бахмут атрофидаги жангларда қатнашмоқда, Кондрашкинга Украина қуролли кучлари 3-алоҳида штурм бригадасининг Андрийивка ҳудудидаги ҳужумларини қайтариш топшириғи берилганди. Бутусовнинг тасдиқлашича, украин ҳарбийлари Кондрашкин масъул бўлган сектор орқали қишлоққа кирган.
18 сентябр куни Украина ҚК қуруқлик қўшинлари қўмондони, Украинанинг шарқий йўналишдаги гуруҳига бошчилик қилаётган генерал Олександр Сирский Бахмут атрофида РФ армиясининг нисбатан энг яхши тайёргарликка эга бўлган бўлинмалари, 72-алоҳида мотоўқчилар бригадаси, 31- ва 83-алоҳида десант-штурм бригадалари яксон этилганини маълум қилди.
Маҳаллий нашрларга кўра, 31-десант-штурм бригадаси, 2014 йил августида Донецк областининг Иловайск шаҳри учун жангларда ҳам қатнашган.
- Андрей Кондрашкин 1979 йилда туғилган. РБК маълумотига кўра, 2001 йилда у В.Ф. Маргелов номидаги Рязан олий ҳаво-десант қўмондонлиги билим юртини тамомлаган, кейин Чеченистондаги аксилтеррор амалиётларда иштирок этган. 2015 йилдан 2019 йилга қадар у 108-гвардия десант-штурмчи Кубан казаклари полкини ва 7-гвардия десант-штурм дивизиясини бошқарган. Кейин 56-алоҳида гвардия десант-штурм бригадасига командирлик қилган.
- 2022 йил 24 февралидан буён РФ мудофаа вазирлиги Украинадаги йўқотишлари ҳақида фақат уч бор хабар берган: ўтган йил мартида, сентябрда, ўшанда мамлакатда ҳарбий сафарбарлик эълон қилинганди. Ўшанда вазир Сергей Шойгу жами 5937 нафар россиялик ҳарбий хизматчи ҳалок бўлганини тасдиқлаганди. Украинанинг 2023 йил ёзидаги қарши ҳужуми бошланганида РФ президенти Владимир Путин Россиянинг йўқотишлари сони Украинаникидан ўн баробар камроқ эканини айтганди. 12 сентябр куни у Украина ҚК йўқотишлари 71 минг кишидан ошишини маълум қилган.
- Россия ҳукумати Украина фронтида ҳалок бўлган зобитлари тўғрисида ҳам бир неча бор хабар берган. Хусусан, Петербург қонунчилик кенгаши раиси Александр Белский июл ойи охирида «Ленинград полки» командири, фронтга сафарбар қилинган полковник Евгений Вашуниннинг ўлими ҳақида хабар қилганди. Ундан олдинроқ эса Украинада генерал-лейтенант, Олег Цоков, қуруқлик қўшинларининг 41-умумқўшин армияси қўмондони ўринбосари, генерал-майор Андрей Суховецкий, 8-армия қўмондони ўринбосари, генерал-майор Владимир Фролов, ҳарбий-ҳаво кучларининг истеъфодаги генерал-майори Канамат Боташев ва бошқа зобитларнинг ўлими тасдиқланган.
