Фото: NPR

ҲАМАС етакчиларидан бири Али Баракеҳ гуруҳ Исроилга нисбатан қандай қилиб кенг кўламли ҳужум уюштирганини тушунтирди.

Унинг сўзларига кўра, операцияда фақат бир неча юқори мартабали раҳбарлар иштирок этган, Эрон ва “Ҳизбуллоҳ” эса режалаштиришда умуман қатнашмаган.

“Х соатини фақат озчилик биларди. Биз душман ўз байрамлари билан банд бўлган вақтни танладик. Ўтган душанба куни ҲАМАС марказий қўмондонлигидан ҳеч ким Байрутда бўлгани йўқ. Операция бошлангунга қадар бу ерда Марказий қўмондонликдан ҳам, Сиёсий бюродан ҳам ҳеч ким бўлмади”, — деди гуруҳнинг Байрутдаги юқори мартабали вакили.

Баракеҳнинг айтишича, гуруҳ Исроил қўлида сақланаётган фаластинликлар ва ҳатто АҚШ қамоқхоналаридаги баъзи маҳбусларни озод қилиш учун гаровга олинган исроилликлардан фойдаланади.

“Америкада уларни ҳибсга олишди, чунки улар Ғазода қамалда қолган одамларни қўллаб-қувватловчи хайрия ташкилотларини юритиш ва Ғазодаги етимларга ёрдам беришда айбланган. Америка бу одамларни Исроил илтимосига кўра ҳибсга олган ва уларга айблов қўйган. Америкада улар умрбод қамоқ жазосига ҳукм қилинган. Биз бу фаластинликларни озодликка чиқаришга интиламиз — уларнинг озодлигини талаб қилиш бизнинг ҳуқуқимиз”, — деди гуруҳ вакили.

ҲАМАС ҳозирча ўз кучларининг озчилигини ҳаракатга келтирди, дейди Баракеҳ. Унга кўра, биргина Ғазода 40 минг жангчи бўлса, сўнгги жангларда улардан икки мингга яқини қатнашган.

Исроил Ғазога қарши қуруқликдан ҳужум бошлаб, Ғазо қирғинбарот урушга дуч келса, Баракеҳнинг айтишича, “иттифоқдошлар” жангга қўшилади. У илгари ҲАМАС Эрон ва “Ҳизбуллоҳ”дан ёрдам олганини тан олди.