Исроил ҳарбийлари ҲАМАС ҳаракатининг Ғазо секторидаги туннеллар тизимига денгиз сувини юборишни бошлади. Бу ҳамасчиларнинг ер ости инфратузилмасини йўқ қилишга қаратилган саъй-ҳаракатлардир, деб ёзди The Wall Street Journal.
Исроил туннелларни Ўрта ер денгизи суви билан тўлдиришга уринмоқда, бу туннеллар тизимини бартараф қилишга қаратилган усуллардан бири экани айтилмоқда.
Исроил расмийларига кўра, ҲАМАС ер ости туннеллар тизимидан жанг майдонидаги амалиётларда фаол фойдаланяпти. У жангчиларга манёвр қилиш, ракета ва ўқ-дориларини сақлаш, шу билан бирга гуруҳ раҳбарларига ўз жангчиларини бошқариш имконини бермоқда. Шунингдек, Исроил туннелларда баъзи гаровга олинганлар сақланаётганига ишонади.
АҚШ расмийларига кўра, туннелларни сув билан тўлдириш учун бир неча ҳафта муддат керак бўлади. Исроил бунинг учун 7 та катта насосни ўрнатган. Аввалроқ, 5 та насос ёрдамида синов тариқасида сув юбориб кўрган эди.
Байден маъмуриятининг баъзи расмийлари денгиз сувидан фойдаланиш самарасиз бўлиши ва Ғазонинг тоза сув таъминотига таҳдид солиши мумкинлигидан хавотирда эди. Аммо бошқа расмийларига кўра, бу усул туннеллар тармоғининг бир қисмини йўқ қилишга ёрдам беради.
Ҳарбий таҳлилчиларга кўра, Исроил туннеллар тармоғининг аксарият қисмини йўқ қила олмайди ва ер ости тизимини бартараф қилиш ёки шикастлаш учун турли усуллар керак бўлади. Денгиз сувидан ташқари, Исроил ҳарбийлари туннелларни ҳаводан зарбалар, суюқ портловчи моддалар, шунингдек, роботлар, итлар ва дронларни юбориш орқали йўқ қилишга уринган.
Аввалроқ, Исроил армияси Ғазода қуруқлик ҳарбий операцияси бошланганидан бери 400 га яқин туннел шахталари топилгани ва йўқ қилингани ҳақида хабар берган эди.
Таъкидланишича, ҲАМАС туннелларини қуриш учун фуқаролик инфратузилмасидан база сифатида фойдаланган. Ер ости инфратузилмаси фуқаролар яшайдиган маҳаллалар, турар-жой бинолари, мактаблар, шифохоналар ва қабристонлар яқинида топилган.
“Замин” янгиликларини “Telegram”да кузатиб боринг
