Рамзан Қодировнинг қизи Хадижат Чеченистон ҳукуматида янги лавозимга тайинланди

^{Фото: Telegram}
Рамзан Қодировнинг қизи Хадижат Қодирова Чеченистон раҳбари ва ҳукумати маъмурияти раҳбарининг биринчи ўринбосари лавозимини эгаллади.

Қодировнинг Telegram каналида хабар берилишича, республика раҳбари ва ҳукумати маъмурияти раҳбари Галас Таймаханов Хадижатни ушбу лавозимга тайинлаш таклифи билан чиққан.

Хадижат Қодирова ўзининг янги лавозимида “ижтимоий блок билан ўзаро ҳамкорлик” ишлари билан шуғулланади, деди Чеченистон раҳбари. Илгари Қодировнинг қизи Грозний мэриясининг мактабгача таълим бўлими бошлиғи лавозимида ишлаган.

Хадижат Қодирова Чеченистон раҳбарининг иккинчи қизи. Очиқ манбалардан олинган маълумотларга кўра, Хадижат Қодирова 17 январь куни 24 ёшга тўлди.

Чеченистон раҳбарининг тўнғич қизи Айшат Қодирова 2023 йил октябрь ойида Чеченистон бош вазирининг ижтимоий масалалар бўйича ўринбосари лавозимини эгаллаган эди.

Рамзан Қодировнинг тўнғич ўғли Ахмат ноябрь ойида Республика Жисмоний тарбия, спорт ва ёшлар сиёсати вазирлиги раҳбарининг биринчи ўринбосари бўлди.

Қодировнинг яна бир ўғли Адам Волгоградда яшовчи Никита Журавелни калтаклаб, Чеченистон Қаҳрамони унвонига сазовор бўлди: Журавел Қуръонни ёқиш туфайли диндорларнинг туйғуларини ҳақорат қилганликда айбланиб ҳибсга олинган эди.

Қодировнинг жами 14 нафар фарзанди бор, улардан иккитаси асраб олинган. “Замин” янгиликларини “Telegram”да кузатиб боринг