Суд Трампни қарийб 355 миллион доллар тўлашга мажбур қилди

^{Фото: Google Images}
Нью-Йорк суди АҚШнинг 45-президенти Дональд Трампни фуқаролик фирибгарлиги бўйича айбдор деб топди. Унга 354,9 миллион доллар тўлаш мажбурияти юкланди.

Шунингдек, судья Артур Энгорон Трампга Нью-Йоркдаги исталган корпорацияда уч йилгача ходим ёки директор сифатида ишлашни тақиқлади, деб хабар бермоқда Reuters. Собиқ президентнинг ўғиллари кичик Дональд ва Эрик Трамп эса 4 миллион доллардан тўлашлари керак.

Судья қарорида айтилишича, Трамп ва иш бўйича бошқа айбланувчилар “ўз ҳаракатлари нотўғри эканлигини тан олмади”. Собиқ президентнинг адвокати Алина Ҳабба қарорни адолатсиз деб атади.

"Бу фақат Дональд Трампга тегишли эмас. Агар бу қарор ўз кучида қолса, у ҳар бир америкаликка Нью-Йорк энди бизнес учун очиқ эмаслигини англатади", — дейилади адвокат баёнотида. Ҳимоячи апелляция бериш ниятида.

Даъво Нью-Йорк бош прокурори, демократ Летиция Жеймс томонидан берилган. У Дональд Трампни банклардан янада қулайроқ шартларда кредит олиш учун 10 йил давомида бойлигини 3,6 миллиард долларга ошириб юборганликда айблади. Собиқ президент ўз айбини тан олмади ва даъвони сиёсий мотивли деб ҳисоблади. “Замин” янгиликларини “Telegram”да кузатиб боринг