Ҳарбий хизматдан қочган 30 дан ортиқ украиналик чегарани кесиб ўтишга уриниб, ҳалок бўлди

^{Фото: Тhе Kyiv Independent}
Украинада 30 дан ортиқ эркак ҳарбий хизматдан қочиш учун мамлакат ғарбидаги тоғли чегара ҳудудини кесиб ўтишга уриниб, ҳалок бўлган. Бу ҳақда Украина Давлат чегара хизмати хабарига асосланиб, Тhе Kyiv Independent нашри хабар берди.

Давлат чегара хизмати раҳбари Андрей Демченко бу хабарни тасдиқлаган. Расмийлар ҳалок бўлганлар оила аъзоларига ҳамдардлик билдирган.

Мамлакатдаги ҳарбий ҳолатга кўра, 18 ёшдан 60 ёшгача бўлган украиналик эркаклар, айрим истисно ҳолатлардан ташқари, ҳарбий хизматга чақирилиши эҳтимоли сабабли мамлакатни тарк этишлари мумкин эмас.

BBC’нинг 2023 йил ноябрь ойидаги ҳисоботида айтилишича, ўша пайтга қадар 20 000 нафарга яқин украиналик эркаклар чегарани ноқонуний кесиб ўтиб хорижга қочган. Уларнинг кўпчилиги чегара тартибини бузувчи жиноий гуруҳлар томонидан хорижга олиб чиқиб қўйилган. Бундай хизмат учун улардан катта ҳақ талаб қилинган.

Украина шарқида кенг миқёсли босқин бошланганидан буён давлат чегарасини қўриқлаш хизмати томонидан чегарадан ноқонуний равишда одамларни олиб ўтувчи 450 га яқин жиноий тармоқлар фош этилган. Гуруҳларнинг кўпчилиги Украинанинг Молдова ва Руминия билан чегарасида фаолият олиб борган.

Давлат чегара хизматининг 29 апрель кунидаги хабарига кўра, 27 апрель оқшомида Закарпате вилоятида чегара бўйидаги Тиза дарёсини кесиб ўтишга уринган жами 24 киши чўкиб кетган. Уларнинг кўпчилиги ҳалок бўлган. «Замин» янгиликларини «Вконтакти»да кузатиб боринг