Испанияда каталониялик айирмачилар учун амнистия тўғрисидаги қонун қабул қилинди

^{Фото: AP}
Испания парламентининг қуйи палатаси – Депутатлар конгресси 30 май, пайшанба куни Каталония мустақиллиги тарафдорлари учун амнистия тўғрисидаги қонунни қабул қилди. Тегишли қонун лойиҳасини 177 депутат қўллаб-қувватлади, 172 нафари қарши чиқди. 2017 йилда Испаниянинг ушбу шимоли-шарқий минтақасидан ажралиб чиқиш бўйича муваффақиятсиз уринишдан кейин мамлакат суд органлари томонидан жавобгарликка тортилган 400 га яқин каталониялик фаол амнистияга тушиши тахмин қилинмоқда. Улар орасида Каталония женералитетининг собиқ президенти (ҳукумат раиси) Карлес Пучдемон ҳам бор, у узоқ йиллик сургундан кейин ватанига қайтиш ниятида.

Қонун Испания қонун чиқарувчи органининг расмий ресурсида эълон қилинганидан сўнг яқин кунларда кучга киради, дея хабар беради dpa.

Испанияда - амнистия қонунига қарши намойишлар

26 май куни Мадрид марказида Испания бош вазири Педро Санчес сиёсатига қарши навбатдаги норозилик намойиши бўлиб ўтди. Расмий маълумотларга кўра, мухолифатдаги Алберто Нунес Фейхоо Халқ партияси (ХП) томонидан ташкил этилган намойишда 20 мингга яқин одам иштирок этган. Улар Санчеснинг ҳукумат раҳбари лавозимидан кетишини талаб қилди.

Тадбирда сўзга чиққан консерватор Фейхоо социалист Санчесни «суиистеъмоллик ва ҳаддан ошиб кетишда» айблаб, уни Каталония бўлгинчиларига нисбатан амнистия тўғрисидаги қонун лойиҳасини қайтариб олишга чақирди. Унинг сўзларига кўра, Санчес ҳукумати сиёсати туфайли «мамлакат боши берк кўчага кириб қолган». Мухолифатчининг таъкидлашича, Испания - «барча фуқаролар қонун олдида тенг бўлган ҳуқуқий давлат».

Амнистия тўғрисидаги қонун лойиҳаси - Санчеснинг Каталония партияларига ёнбосиши

Испанияда бир неча ойдирки, Санчеснинг каталониялик бўлгинчиларни афв этиш режасига қарши намойишлар бўлиб ўтмоқда. 2023 йилда ўтган сўнгги парламент сайловларида иккинчи ўринни эгаллаган ва Халқ партиясидан консерваторларга етакчиликни бой берган Санчес бошчилигидаги Испания Социалистик ишчилар партияси Каталониянинг икки партияси билан 2017 йил Каталония мустақиллигини эълон қилишга бўлган муваффақиятсиз уринишда иштирок этган сиёсатчиларни амнистия қилиш бўйича келишувга эришди.

Муваффақиятсиз референдумдан сўнг Белгияга қочган Пучдемон май ойи ўрталарида 12 майдаги сайловлардан сўнг у ерда озчилик ҳукуматини бошқариш учун Барселонага қайтишни истаётганини эълон қилган эди.

Каталониядаги сайловлар: минтақани узоқ вақт бошқарган сепаратистлар мағлубиятга учради

12 май куни бўлиб ўтган Каталония мухторияти парламентига сайловларда қиролликдаги ҳукмрон Социалистик партиянинг минтақавий бўлими ҳисобланган Каталония социалистик партияси ғалаба қозонди. Охирги қирқ йил давомида ҳокимиятни навбатма-навбат ёки коалицияда ушлаб турган «Каталония учун бирга» ва «Каталония сўл республикачилари» айирмачи партиялар мағлубиятга учради.

Кузатувчилар бу натижаларни «аҳоли сиёсатдан чарчагани» билан изоҳлади. Бироқ, ғалаба қозонган, лекин парламентда мутлақ кўпчиликни олмаган социалистлар маҳаллий ҳукуматни шакллантириш учун иттифоқчилар излашга мажбур бўлади, бу автономия доирасида анча қийин вазифадир. «Замин»ни Telegram’да ўқинг!