Камчаткада бортида 22 киши бўлган вертолёт ҳалокатга учради

^{Фото: Россия ФВВ}
Россиянинг Камчатка яриморолида 31 август куни бедарак йўқолган «Ми-8» вертолётининг қолдиқлари экипаж охирги маротаба алоқага чиққан жойдан 900 метр узоқликдан топилди.

Қайд этилишича, ҳаво кемаси денгиз сатҳидан 1556 метр баландликда жойлашган Вачкажец вулқони томон уюштирган парвозида ҳалокатга учраган.

«Витяз-Аэро» авиакомпаниясига тегишли вертолёт бортида 22 киши — уч нафар экипаж аъзоси ва 19 нафар йўловчи бўлган. «РБК» нашри манбалари йўловчилар орасида Россия футбол иттифоқининг молиявий директори Арсений Замятин ҳамда унинг рафиқаси ҳам бўлганини айтмоқда.

Вертолёт экипажи ҳаво кемаси йўқолган куни соат 07:15 да алоқага чиқиши керак эди, аммо бу содир бўлмаган.

«Ми-8Т»ни қидириш ишларига бошқа бир вертолёт жалб этилган. Шунингдек, қидирувга еттита пиёдалар гуруҳи (60 нафар мутахассис) ва 15 та техника сафарбар қилинган. Россия ФВВга кўра, вертолётни қидириш ишлари тунда ҳам давом этган ва 1 сентябр куни унинг қолдиқлари топилган.

«ТАСС»нинг тезкор хизматларга таяниб маълум қилишича, вертолёт тепаликка қулаган ва унинг бортида бўлганларнинг ҳеч бири омон қолмаган. «Ҳалокат ноқулай об-ҳаво шароитида учувчи хатоси сабаб юзага келган бўлиши мумкинлиги — асосий версия сифатида кўриб чиқилмоқда. Туманда учувчи тепаликни пайқамай, унинг ёнбағрига урилган», — дейилади ҳалокат оқибатларни бартараф этиш бўйича штаб хабарида.

Маълумотларга кўра, вертолётни Денис Блешик исмли учувчи бошқарган. Унинг собиқ ҳамкасби Алексей Астротиннинг айтишича, Денисда парвоз қилишга рухсатнома бўлган, иш тажрибаси 12 йилдан ортиқ. “Замин” янгиликларини “Facebook”да кузатиб боринг