Трамп янгиланган айбловлар бўйича ўз айбини тан олмади

^{Фото: AP}
АҚШ собиқ президенти Доналд Трамп махсус маслаҳатчи Жек Смит тақдим этган янгиланган айблов хулосаси доирасида ўз айбини тан олмади. Бу ҳақда 3 сентябр, сешанба куни Колумбия пойтахт округи федерал судига тақдим этилган адвокат ҳужжатида айтилади.

Ахборот агентликларининг аниқлик киритишича, Трамп айблов эълон қилинганда иштирок этиш ҳуқуқидан ҳам воз кечган. Бунинг ўрнига, адвокатлар республикачининг айбсизлигини унинг номидан маълум қилишлари керак. Эълон қилиш 5 сентябр куни бўлиб ўтади, деб эслатади AFP.

Трампга қарши айблов хулосаси таҳрир қилинди

АҚШ махсус прокурори Жек Смит собиқ президент Доналд Трампга 2020 йилги президентлик сайловлари натижаларини сохталаштиришга уриниш бўйича янгиланган айблов эълон қилди. Бу ҳақда 28 август куни ахборот агентликлари хабар берди.

Вашингтондаги АҚШ Олий суди 1 июл куни Трампнинг жиноий жавобгарликка тортилишдан қисман дахлсизлиги ҳақида қарор чиқарганидан сўнг, Смит иш бўйича айблов хулосасини ўзгартиришга мажбур бўлди. Гап собиқ президентнинг конституциявий ваколатлари доирасида содир этган ҳаракатлари учун жиноий жавобгарликка тортилишдан ҳимояланиш ҳақида бормоқда. Бироқ, Трамп фуқаро сифатидаги хатти-ҳаракатларига оид суд жараёнларида иммунитетга эга эмас, дея таъкидлади Олий суд.

Шунга кўра, янги айбловда Доналд Трампнинг президент сифатида қилган ҳаракатларига оид барча айбловлар олиб ташланади. Бунинг ўрнига, 2020 йилги сайловда номзод сифатида нима қилганига урғу берилади. Жиноят кодексида Трампга айблов қўйилаётган моддалари ўзгаришсиз қолмоқда. Собиқ президент (ва кузда бўлиб ўтадиган янги сайловларда республикачи номзод)нинг ўзи Truth Social ижтимоий тармоғида Смит «Олий суд қарорини четлаб ўтиш учун шунчаки ўша ишни қайта ёзганини» билдирган.

Суд жараёни сайловдан олдин бошланиши даргумон

Трампнинг расмий ва шахсий ҳаракатлари ўртасидаги фарқни амалда аниқлаштириш осон бўлмагани учун суд жараёни 5 ноябр куни бўлиб ўтадиган АҚШ президентлиги сайлови олдидан бошланиши эҳтимолдан йироқ, деб ёзади AFP. Унга кўра, бу кечикишнинг ўзи Трамп учун катта муваффақиятдир. Агар у Оқ уйга қайтса, АҚШ Адлия вазирлигига айбловларга чек қўйиш бўйича кўрсатма бериши мумкин, деб ёзади агентлик.

АҚШда президентлик сайловлари 5 ноябр куни бўлиб ўтади. Оқ уй раҳбари Жо Байден, жумладан, Демократик партиядаги ҳамкасбларининг хавотирлари ортиб бораётган бир пайтда, 21 июл куни президентлик пойгасидан чиқишини эълон қилди ва вице-президент Камала Ҳаррис номзодини қўллаб-қувватлади. Ҳаррис олий давлат лавозимига ўз номзодини қўйишга рози бўлди.

Доналд Трамп ва унинг демократ рақиби Ҳаррис ўртасидаги теледебат 10 сентябр куни ABC News телеканалида бўлиб ўтади. “Замин” янгиликларини “Инстаграм”да кузатиб боринг