Москва областида 2025 йилдан бошлаб мигрантлар меҳнати чекланиши мумкин

^{Фото: ТАСС}
2025 йил 1 январдан бошлаб Москва области маъмурияти бир неча фаолият соҳаларида патент бўйича чет эл фуқароларининг меҳнатига чекловлар жорий қилади. Уларнинг ўрнини россияликлар ёки ЕОИИ (Евроосиё иқтисодий иттифоқи) мамлакатлари фуқаролари эгаллайди. Бу ҳақда ТАСС хабар берди.

Режага кўра, мигрантларга алкогол ва тамаки савдоси, кўча овқатлари, ижтимоий хизматлар, шунингдек, спорт, маданият, дам олиш, соғлиқни сақлаш ва таълим соҳаларида ишлашга чекловлар жорий этилади. Бу билан расмийлар «эҳтимолий можароларни минималлаштиришни хоҳлайди».

«3 йил давомида бизда хорижлик ишчи кучи билан боғлиқ савдо шикоятлари сезиларли даражада ошди. Ҳозир уларнинг Москва областида спиртли ичимликлар, пиво ва тамаки сотадиган чакана савдо дўконларида ишлаши учун маълум чегара (15%) мавжуд. Биз патент билан ишлашни тўлиқ тақиқлаган 22 минтақага қўшилишни хоҳлаймиз. Бундан ташқари, мен стационар бўлмаган савдо объектларида, ижтимоий соҳаларда: спорт, иш, дам олиш, шунингдек, соғлиқни сақлаш, ижтимоий хизматлар ва таълим соҳасида, кўча таомлари соҳасида патент бўйича мигрантларнинг ишини чеклашни таклиф қилмоқчиман. Бу ерда тилни сифатли билиш муҳим, чунки улар аҳоли билан ишлайди», деди Москва области ҳукумати раиси ўринбосари Наталя Масленкина.

Шунингдек, у ушбу тақиқлар жорий этилиши билан алмаштириладиган патент эгалари сони 5,6 минг кишини ташкил этишини таъкидлади.

«Иқтисодий жиҳатдан бу бизнинг ватандошларимиз, шунингдек, ЕОИИ фуқаролари ҳисобидан тўлдирилиши мумкин», деди Масленкина.

Шунингдек, мигрантлар Россияда ишлаш учун махсус патентга эга бўлиши кераклиги, унинг йўқлиги учун жавобгарлик ҳам ишчининг ўзи, ҳам у ишлаётган ташкилот зиммасида эканлиги маълум қилинган. “Замин” янгиликларини “Facebook”да кузатиб боринг