АҚШнинг Флорида штатига кучли “Милтон” тўфони ва торнадо ёпирилди (видео)

^{Фото: AP}
АҚШнинг Флорида штатига катта вайронагарчилик ва қурбонлар олиб келиши кутилаётган “Милтон” тўфони ва торнадо штатнинг ғарбий қирғоқларига етиб келди. Бу ҳақда ABC News хабар берди.

Флоридага етиб боришдан олдин “Милтон” бир оз заифлашган ва энг хавфли бешинчи тоифадан дастлаб тўртинчи, кейин эса учинчи (шамол тезлиги 208 км/соат)га кўчирилган. Бироқ экспертлар, “Милтон” ҳали ҳам вайронкор ва ҳалокатли эканини айтмоқда. Аллақачон 1,9 миллиондан ортиқ аҳоли электр энергиясиз қолган, 125 та уй вайрон бўлган.


Президент Жо Байден ҳам тўфон вайронкор бўлишидан огоҳлантириб, аҳолини эвакуация буйруқларига қулоқ солишга чақирган.

“У аҳоли пунктларини бутунлай вайрон қилиши ва одамлар ўлимига олиб келиши мумкин”, деган АҚШ етакчиси.
Американинг тўфонларни ўрганиш миллий маркази Гринвичда тунги соат иккиларда “Милтон” қуруқликка чиққандан сўнг бир оз заифлашгани ва иккинчи тоифага ўтказилганини эълон қилди. Иккинчи тоифада доимий шамол тезлиги 154 дан 177 км/соатгача бўлади.

Ҳозирда “Милтон” Флорида яримороли орқали шимоли-шарққа, Атлантика океани томон ҳаракатланмоқда. “Замин” янгиликларини “Telegram”да кузатиб боринг