Россияда мигрантларни назорат этадиган «Мигрант ID» жорий қилиниши мумкин

Россия Давлат Думасига «Мигрант ID» деб аталувчи ҳужжат – чет эл фуқаросининг шахсини тасдиқловчи, мамлакатда вақтинча бўлиш имконини берувчи электрон маълумот сақлаш воситасини жорий қилиш бўйича қонун лойиҳаси киритилади. Тегишли ташаббус билан «Новые люди» фракцияси депутатлари ва раҳбари Алексей Нечаев чиқди. Бу ҳақда «Ведомости» хабар берди.

Таъкидланишича, «Мигрант ID» веб-сайтлардаги шахсий кабинетга ўхшаш тарзда ишлайди ва фақат электрон шаклда мавжуд бўлади. Муаллифлар Россия ҳудудига киришдан олдин «Мигрант ID» расмийлаштиришни мажбурий қилишни таклиф этмоқда. Муаллифларнинг таъкидлашича, юқори малакали мутахассис бўлган чет эл фуқаролари «Мигрант ID»ни соддалаштирилган тартибда олиши мумкин бўлади.

«Мигрант ID» учун ариза берувчи вақтинчалик яшаш учун рухсатнома олишда талаб қилинадиган маълумотларни, жумладан, судланганлик, маълумоти, малакаси, тиббий кўрикдан ўтганлик ва яшаш муддати тўғрисидаги ҳужжатларни тақдим этиши керак. Агар қонун лойиҳаси қабул қилинса, ҳужжат Россиядаги барча ҳуқуқий операциялар, жумладан, уй-жой ижараси ва хизматларни олиш учун мажбурий бўлади.

«Новые люди» шунингдек, «Мигрант ID» ҳужжати бўлмаган мигрантларга барча тўловларни тақиқламоқчи. Мигрантлар банк ҳисоб рақамини очиши ва уйни ижарага олиш ва хорижга пул ўтказиш бўйича барча операцияларни тизим ёрдамида амалга ошириши керак бўлади. Тизимда расмий уй-жой ижараси, иш жойи ёки солиқ тўлови тўғрисидаги маълумотлар бўлмаса, мигрант депортация қилинади.

Шунингдек, агар қонун кучга кирса, Россияда бўлиб турган барча мигрантлар 30 кун ичида «Мигрант ID» олиши керак бўлади. Акс ҳолда улар депортация қилинади, деб тушунтирди «Новые люди» фракцияси раҳбари Алексей Нечаев. “Замин” янгиликларини “Youtube”да кузатиб боринг