Трамп молия вазирлиги раҳбари лавозимига инвестор Скотт Бессент номзодини илгари сурди

^{Фото: Reuters / Скотт Бессент}
АҚШнинг сайланган президенти Дональд Трамп АҚШ молия вазири лавозимига инвестор Скотт Бессент номзодини илгари сурди. Трамп бу ҳақда Truth Social ижтимоий тармоғида ёзган.

“Скотт геосиёсат ва иқтисодиёт соҳаларида етакчи халқаро инвестор ва стратеглардан бири сифатида ҳурматга сазовор”, дейилади баёнотда. Ҳозирда АҚШ молия вазири лавозимида Жанет Еллен фаолият юритмоқда.

Бессентнинг номзоди илгари сурилишидан олдин Республикачилар жамоаси ичида шиддатли ички кураш кечди. Америка матбуоти хабарларига кўра, Бессентдан ташқари, Федерал резерв бошқарув кенгашининг собиқ аъзоси Кевин Уорш, Apollo Glibal Management инвестиция компанияси эгаси Марк Роуэн, Теннесси штатидан республикачи сенатор Билл Хейгерти ва АҚШнинг савдо бўйича бош музокарачиси Робер Лайтхайзер бу лавозим учун курашаётган эди.

Wall Street Journal нашри манбаларига таяниб, Бессентнинг иттифоқчилари “саҳна ортида кампания уюштиргани” ва сайланган президентни уни танлашга ишонтира олганини ёзади. Бессентнинг номзоди, жумладан, Трампнинг биринчи президентлик даврида Оқ уй Миллий иқтисодий кенгаши раҳбари Лоуренс Кудлоу томонидан қўллаб-қувватланди.

^{Фото: EADaily}
Аввалроқ Илон Маск ва яна бир тадбиркор Вивек Рамасвами Трампнинг бўлажак администрациясида иш бошлаши кутилаётгани маълум қилинганди.

"Биргаликда бу икки ажойиб америкалик менинг маъмуриятим учун давлат бюрократиясини демонтаж қилиш, ортиқча қоидаларни, керакциз харажатларни камайтириш ва федерал агентликларни қайта ташкил этиш йўлини очиб беради", деган Трамп. «Замин»ни Telegram’да ўқинг!