19:38 / 05.02.2025

Путиндан кейин ким Россия президенти бўлиши айтилди

АҚШ матбуоти Россия президенти Владимир Путиндан кейин мамлакат раҳбарлигига ким келиши борасида кутилмаган тахминни илгари сурди.

Fox News нашрида чоп этилган мақолага кўра, россиялик таниқли хоккейчи, “Вашингтон Кэпиталз” (АҚШ) клуби сардори Александр Овечкин Россиянинг кейинги етакчиси бўлиши мумкин.

Шарҳловчи Дуглас Маккиннон ёзишича, Александр Овечкин дунёга машҳур спортчилар сирасига киради. У оилапарвар, қўли очиқ саховатпеша ва тартиб-интизомли инсон сифатида танилган. Россиянинг Украинага босқинчилик уруши бошланиб, дунё бўйлаб рус спортчиларига қарши нафрат кучайган пайтда ҳам унинг номига соя тушмади. Энг қизиғи, Овечкин Путин билан илиқ муносабатини сақлаб қола билди.

Муаллифнинг таъкидлашича, эртами-кечми, Путин президентликни тарк этгач, унинг ўрнини ким эгаллайди деган савол ўртага чиқади. Ўша вақтда машҳурлик, етакчилик каби сифатларга эга, ҳам Россия, ҳам хорижда ҳурмат қозонган Овечкин президентликка муносиб номзод бўлиши мумкин.

^{Овечкин Путинга хайрихоҳ шахс деб таърифланади.
Фото: Getty Images}
Мақолада спортчи ҳозирга қадар катта сиёсатга яқинлашмагани, аммо нуфуз ва обрў-эътибор уни Кремлга етаклаши айтилган.

Бу йил кузда 40 ёшга тўладиган Александр Овечкин хоккей бўйича уч карра жаҳон чемпиони бўлган. У президент Путинга хайрихоҳ ва унинг меҳрини қозонган шахс деб таърифланади. Овечкин 2017 йил ноябрь ойида президентлик сайлови олдидан Путинни қўллаб-қувватловчи норасмий Putin Team ватанпарварлик ҳаракатини ташкил қилган эди. Путин ҳам хоккейчига ўз вақтида Mercedes машинасидан тортиб сервизгача совға қилгани маълум.

2022 йил февраль ойида Россия Украинага бостириб кирганидан кейин ҳам Овечкин тинчликка чақиргани ҳолда Путин шаънига номақбул сўз айтмаган.

Аввал хабар берганимиздек, айрим таҳлилчилар Украинадаги муваффақиятсиз ҳарбий юриш ортидан Россияда ҳокимият алмашуви рўй бериши ҳақида ёзган. Баъзи экспертлар Путин аллақачон мутлақ ҳокимиятни бой бера бошлагани ҳақидаги фаразни ҳам илгари сурган. Масалан, россиялик сиёсатшунос Аббас Галлямов Путин ва унинг хос аъёнлари Украина уруши муваффақиятсиз тугаса, хорижга қочишни режалаштираётгани ҳақида хабар берган эди. Ўз даврида Путин командасида фаолият юритган А.Галлямовга кўра, қочиш операцияси “Нуҳ кемаси” деган рамзий ном билан аталган.

Россия собиқ бош вазири Михаил Касьянов эса Путинга хавфсизлик гарови эвазига ҳокимиятдан кетиш таклифи берилиши мумкинлиги ҳақида айтганди. Собиқ бош вазир Хитой Путинни ўз ҳимоясига олиши ва унинг хавфсизлигини кафолатлаши мумкин бўлган ягона давлат эканини таъкидлаган.

Аммо Германия федерал разведка хизмати раҳбари Бруно Каль бу каби тахминларни рад этиб, Путиннинг ҳокимияти мустаҳкам эканини айтган. Унинг фикрича, Россиянинг Украина урушидаги нўноқликлари борасида жамоатчилик эътирозлар билдирмоқда, аммо бу Путиннинг курсиси лиқиллаб қолганини англатмайди.

2023 йилда интернетга сиздирилган АҚШ махсус хизматларига тегишли махфий ҳужжатларда Путин онкологик хасталикка чалингани баён қилинган.

72 ёшли Путиннинг шахсий ҳаёти ҳамда саломатлиги Россияда тақиқланган мавзулар саналади. Расмий ОАВда мамлакат раҳбари мунтазам равишда спорт билан шуғулланувчи, соғлом ҳаёт тарзига одатланган шахс сифатида кўрсатилади. Унинг жиддий хасталикка чалингани хусусидаги хабарлар ҳам рад этиб келинади.