Макрон Трамп билан учрашуви натижалари ҳақида нималар деди?

^{Фото: Reuters}
Франция президенти Эммануэл Макрон Fox News телеканалига берган интервюсида «яқин ҳафталарда» Украина ва Россия ўртасида сулҳ тузилиши мумкинлигига ишонишини айтди.

«Аввал сулҳ керак. Ўйлайманки, яқин ҳафталарда бунинг имкони бўлади. [...] Агар унга риоя қилинмаса, Россия бунга жиддий қарамаётганининг энг яхши исботи шу бўлади», — деган Макрон.

У сўзида давом этиб, сулҳ вақтида узоқ муддатли тинчлик, хавфсизлик кафолатлари, ҳудуд ва Украинани тиклаш бўйича музокаралар олиб бориш мумкин бўлишини билдирган. АҚШ нодир металлар бўйича шартнома тузиши мумкин, бу Макроннинг фикрича, АҚШ Украина суверенитетини қўллаб-қувватлашининг энг яхши кафолати бўлади.

Шу билан бирга, Франция президенти ҳар қандай тинчлик келишуви «Украинанинг таслим бўлиши» бўлмаслиги кераклиги, уни хавфсизлик кафолатлари билан мустаҳкамлаш зарурлигини таъкидлади.

Бундай кафолатларнинг эҳтимолий вариантлари орасида Макрон Киевга «кучли армия»га эга бўлиш (камида 800 минг аскар, дея аниқлик киритди у) ва Украинага Европа тинчликпарвар контингентини юборишга тайёрлигини айтди. Унинг сўзларига кўра, улар Буюк Британия бош вазири Кир Стармер билан биргаликда европалик ҳарбийларни «фронт чизиғида эмас, балки тинчлик шартномасида келишилган алоҳида жойларда» жойлаштиришни назарда тутувчи таклифни ишлаб чиқмоқда. Уларнинг иштироки, деди Макрон, «АҚШ кўмагида» тинчликни сақлашга ёрдам беради ва «бизга бўлган жамоавий ишонч»ни англатади.

Макроннинг айтишича, у аллақачон ўз таклифларини Европанинг бошқа 30 давлати раҳбари билан муҳокама қилган ва уларнинг кўпчилиги Украина учун хавфсизлик кафолатларини таъминлашда иштирок этишга тайёр.

Макрон Доналд Трамп билан учрашуви ва Америка президенти билан қўшма матбуот анжуманидан кўп ўтмай Fox News телеканалига интервю берди.

Ушбу матбуот анжуманида Трамп, шунингдек, аввал сулҳ тузиш, кейин эса — узоқ муддатли тинчлик ўрнатишни мақсад қилганини айтди. Бироқ у хавфсизлик кафолатлари ҳақида гапирмади.

«Биз тез, аммо мўрт бўлмаган [тинчлик] келишувини хоҳлаймиз», — деди Макрон матбуот анжуманида.

Франция ва АҚШ президентлари тинчлик келишувининг бир қисми Украинадаги Европа тинчликпарвар контингенти бўлиши кераклигига келишиб олишган. Трампнинг айтишича, у бу ҳақда Россия президенти Владимир Путин билан гаплашиб бўлган ва у Трампнинг сўзларига кўра, бунга рози бўлади.

«Мен унга [Путинга] бу саволни атайлаб бердим, — деди Трамп. — Унинг бу таклиф билан муаммоси йўқ». Аввалроқ Россия расмийлари Украинада европалик ҳарбийларни жойлаштириш ғоясини рад этган эди.

Франция президенти Макрон — Доналд Трамп билан у Оқ уйга қайтганидан кейин учрашган илк европалик давлат раҳбари бўлди. Макрон ортидан жорий ҳафтада Буюк Британия бош вазири Кир Стармер ҳам Трамп билан учрашиш учун Вашингтонга учишни режалаштирмоқда. “Замин” янгиликларини “Telegram”да кузатиб боринг