Сурияда собиқ президент Башар Асад тарафдорлари ва янги ҳукумат хавфсизлик кучлари ўртасида жиддий тўқнашувлар кузатилди. Оқибатда 13 киши ҳалок бўлди. Reuters агентлигининг хабар беришича, бу воқеа Суриянинг ғарбида жойлашган Жабла шаҳрида содир бўлган.
Жабла шаҳри Асад ва унинг оиласи мансуб бўлган алавийлар жамоаси истиқомат қиладиган ҳудудлардан бири ҳисобланади. Янги ҳукумат хавфсизлик кучлари Асад даврида махсус кучлар собиқ қўмондони Суҳел ал-Ҳасан билан алоқадор қуролли гуруҳларга қарши ҳаракат олиб борган.
Комендантлик соати эълон қилинди
Тўқнашувлар авж олиши сабабли Суриянинг Латакия, Тартус ва Ҳомс шаҳарларида комендантлик соати жорий этилди. Латакия жамоат хавфсизлиги бошқармаси раҳбари Мустафо Кнефатига кўра, “Асад милициясининг қолдиқлари” Жабладаги хавфсизлик кучларининг назорат-ўтказиш пунктлари ва патрулларига олдиндан пухта режалаштирилган ҳужумни амалга оширган. Бу ҳужум кўплаб ҳарбийларнинг ҳалок бўлиши ва яраланишига олиб келган.
Сиёсий вазият кескинлашмоқда
Ҳозирда Ҳалаб, Идлиб, Дамашқ, Ҳама ва Ҳомс шаҳарларида ҳукуматни қўллаб-қувватлашга қаратилган намойишлар бўлиб ўтмоқда. Reuters агентлиги таъкидлашича, мазкур тўқнашувлар 2024 йил декабрь ойида янги ҳукумат ҳокимият тепасига келганидан буён кузатилган “энг шафқатсиз зўравонлик ҳаракатларидан бири” ҳисобланади.
2024 йил декабрь ойида “Ҳайъат Таҳрир аш-Шом” жангчилари Дамашқка кириб, мамлакатда ҳокимиятни эгаллаган эди. Башар Асад эса қочиб, Москвада паноҳ топган. Янги ҳукумат томонидан Суриянинг ўтиш даври президенти этиб Аҳмад ал-Шаръа тайинланган.
Ҳозирги тўқнашувлар янги ҳукуматнинг мустаҳкамланиш жараёнида жиддий қаршиликка учраётганини кўрсатмоқда. Сиёсий ва ҳарбий вазиятнинг қай йўналишда ривожланиши ҳали ҳам номаълум бўлиб қолмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
