Трамп Украинадаги атом электр станцияларини АҚШ назоратига олишни таклиф қилди

АҚШ президенти Доналд Трамп Украинадаги атом электр станцияларини назорат қилишни ўз мамлакатига ўтказиш таклифини билдирди. Бу ҳақда АҚШ давлат котиби Марко Рубио ва миллий хавфсизлик бўйича маслаҳатчи Майкл Уолц маълум қилди.

19 март куни Доналд Трамп ва Украина президенти Володимир Зеленский ўртасида ўтказилган телефон мулоқотидан сўнг, Оқ уй маъмурияти вакиллари ушбу таклифни эълон қилди. Рубио ва Уолцнинг таъкидлашича, Трамп Украина энергетика инфратузилмасини ишончли ҳимоя қилишнинг энг самарали йўли атом электр станцияларини АҚШ бошқарувига ўтказиш эканини айтган.

Трамп АҚШ электр энергияси ва коммунал хизматлари соҳасидаги кенг тажрибасидан фойдаланиб, атом электр станцияларини ишга тушириш ва уларнинг хавфсизлигини таъминлашда катта ёрдам кўрсатиши мумкинлигини қайд этган.

Шунингдек, президент Трамп Украинага Patriot ҳаво мудофаа тизимларини етказиб бериш масаласида ҳам Зеленский билан ҳамкорлик қилишга ваъда берган. Зеленский бу суҳбатни «ижобий, мазмунли ва самимий» деб баҳолаб, АҚШ президентига кўрсатилаётган ёрдам учун миннатдорчилик билдирган.

Икки давлат раҳбарлари, шунингдек, Курск вилоятидаги вазиятни муҳокама қилиб, ҳарбий вазият ўзгарган шароитда мудофаа идоралари ўртасида маълумотлар алмашинувини янада кучайтиришга келишиб олган. “Замин” янгиликларини “Telegram”да кузатиб боринг