Германия Федерал разведка хизмати ва Бундесвер томонидан тайёрланган янги ҳисоботда Россия 2030 йилларга бориб НАТО билан кенг кўламли ҳарбий тўқнашувга тайёр бўлиши мумкинлиги таъкидланди. Ҳисоботга кўра, Россия президенти Владимир Путин бу урушни тизимли деб ҳисобламоқда ва унга пухта ҳозирлик кўрмоқда.
Россиянинг ҳарбий салоҳияти ортмоқда
Германия разведкаси маълумотларига кўра, айни пайтда Россия тўғридан-тўғри НАТОга қарши тўқнашув учун етарли кучга эга эмас. Аммо Литва махсус хизмати баҳолашича, Москва НАТО аъзоси бўлган бир нечта давлатга қарши чекланган ҳарбий операция ўтказиб, альянснинг жавоб реакциясини синаб кўриши мумкин.
Ҳисоботда қайд этилишича:
- Россия Украина билан уруш давомида ҳарбий йўқотишларни тиклашга муваффақ бўлмоқда.
- Россиянинг ҳарбий саноати фронт эҳтиёжларидан кўпроқ қурол-яроғ ишлаб чиқаришни бошлаган.
- Украина уруши тугагач, Россия қўшинлари тез орада Болтиқбўйи давлатлари чегарасига йўналтирилиши мумкин.
Мудофаа харажатлари кескин ошди
Россия ҳукумати уруш давомида мудофаа харажатларини кескин оширди. Охирги уч йил ичида армия ва қурол-яроғ ишлаб чиқариш учун 22 триллион рубл сарфланган. 2025 йил бюджетида эса 13,2 триллион рубль (умумий харажатларнинг 30%) ҳарбий мақсадларга йўналтирилган.
Владимир Путин 2024 йил сентябрь ойида Россия армияси сонини 2,38 миллион кишига етказиш ҳақида қарор қабул қилди. Бу билан Россия қуролли кучлари дунёда Хитойдан кейин иккинчи ўринга чиқди.
НАТО Россия таҳдидига тайёр
26 март куни НАТО бош котиби Марк Рютте альянс Россиянинг эҳтимолий тажовузига қарши кескин огоҳлантириш берди.
"Агар кимдир хато қилиб, Полша ёки бошқа иттифоқдошларимизга ҳужум қилса ва бу жазосиз қолади деб ўйласа — у НАТО кучларининг тўлиқ қудрати билан тўқнашади. Бизнинг жавобимиз ҳалокатли бўлади," — деди Рютте Варшавада Полша бош вазири Доналд Туск билан учрашувда.
НАТО аъзолари Россия таҳдидига қарши кучайтирилган ҳарбий тайёргарликни давом эттираётгани, айниқса Болтиқбўйи ва Шарқий Европада ҳарбий имкониятларни мустаҳкамлашга эътибор қаратаётгани қайд этилган.
Германия разведкаси ҳисоботи Россия НАТОга қарши кенг кўламли урушга жиддий ҳозирлик кўраётганини ва Украина уруши тугагач, Россия Болтиқбўйи давлатларига йўналиши мумкинлигини кўрсатмоқда. НАТО эса бундай таҳдидларга қарши таъсирчан жавоб беришга тайёрлигини билдириб, ҳарбий кучларини мустаҳкамламоқда.
Яқин йилларда Россия ва НАТО ўртасидаги кескинлик янада ортса, Европада янги можаро пайдо бўлиши мумкин.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
