Труэтт Ҳейнс 24 соатда 10 001 марта турникда тортилиб, жаҳон рекорди ўрнатди (видео)

2025 йил 1 февраль куни АҚШ фуқароси Труэтт Ҳейнс Юта штати, Солт-Лейк-Сити шаҳрида жаҳон тарихидаги энг ҳайратланарли спорт ютуқларидан бирини қайд этди. У Гиннеснинг рекордлар китобига 24 соат ичида 10 001 марта турникда тортилиш орқали янги рекорд ўрнатгани билан кирди.

Гиннеснинг расмий сайтида қайд этилишича, Ҳейнс ушбу натижага катта тайёргарлик ва ирода туфайли эришган. Бу унинг биринчи уриниши эмас – у 2021 йилда ҳам 8 100 марта тортилиб, шунга ўхшаш рекордни ўрнатган эди. Аммо бу натижа узоқ сақланмади: австралиялик Гарри Лойд қисқа фурсат ичида 8 600 марта тортилиб, Ҳейнснинг ютуғини ортда қолдирган эди.

Бироқ америкалик спортчи орқага чекинмади ва жорий йилда барчани лол қолдирадиган натижага эришди – 10 001 марта тортилиш! Бу орқали у нафақат ўзининг аввалги ютуғини қайта тиклади, балки янги маррага ҳам чиқди.

Рекорддан сўнг Ҳейнс шундай деди: "Ўзим ҳақимда шуни айтишим мумкинки, мен ҳеч қачон таслим бўлмайман. Балки мен ноёб қобилият ёки кучга эга эмасман ва ҳаётим давомида ҳам менга ҳеч қачон осон бўлмаган, бироқ тақдир ўз мақсадларимдан воз кечмаслик имкониятини берди."

Спортчи нафақат жисмоний куч-ғайрати, балки маънавий бардоши билан ҳам кўпчиликка ўрнак бўлмоқда. Унинг ютуғи ирода, сабр ва қатъият билан нималарга эришиш мумкинлигини яна бир бор исботлади. “Замин” янгиликларини “Telegram”да кузатиб боринг