Трамп: «Иккинчи президентлик муддатимнинг дастлабки 100 куни АҚШ тарихидаги энг муваффақиятли кунлардир»

АҚШ президенти Доналд Трамп ўзининг иккинчи президентлик муддатининг дастлабки 100 кунини «мамлакат тарихидаги ҳар қандай маъмурият учун энг сермаҳсул кунлар» деб атади. Бу ҳақда у Мичиган штатидаги Уоррен шаҳрида ўз тарафдорлари олдида нутқ сўзлаётганда маълум қилди.

Президент ўз нутқида асосий эътиборни АҚШ автомобиль саноати ва иқтисодий сиёсатга қаратди. Трампнинг таъкидлашича, унинг амалга ошираётган солиқ ва божхона сиёсати натижасида мамлакатда автомобиль ишлаб чиқариш саноати янги босқичга чиқиши кутилмоқда.

Аввалроқ давлат раҳбари автомобиль ишлаб чиқарувчилар учун махсус солиқ имтиёзларини назарда тутувчи фармонни имзолагани хабар қилинган эди. AFP агентлигининг ёзишича, бу имтиёзлар туфайли бутун дунёдан компаниялар ўз заводларини Америка ҳудудида қуриш ва шу ернинг ўзида автомобиллар ишлаб чиқаришга қизиқиб қолади. Мазкур дастурга кўра, АҚШда ишлаб чиқариш билан шуғулланаётган автомобиль компаниялари импорт қисмларига икки йил давомида чегирмали тарифлардан фойдаланиши мумкин бўлади.

Шунингдек, автомобиль ишлаб чиқарувчилар хорижда йиғилган автомобилларга 25 фоизлик бож ёки импорт қилинадиган пўлат ва алюминийга 25 фоизлик тарифлардан бирини тўлайди, холос.

Уоррендаги учрашув вақтида Трамп яна бир бор яқин ҳафта ва ойларда ўз маъмурияти «Америка тарихида мисли кўрилмаган даражада йирик солиқ имтиёзларини» жорий этишга тайёрланаётганини таъкидлади. Унинг сўзларига кўра, Америка бу орқали «олтин аср»га қадам қўяди — бу даврда мамлакатда истеъмол нархлари паст, маошлар эса юқори бўлиб, «дунё тарихидаги энг кучли иқтисодиёт» шаклланади.

Шундай қилиб, Трампнинг бу баёноти келгуси йилларда АҚШ иқтисодий сиёсатининг йўналишлари ва мамлакат автомобиль саноатида кутилаётган катта ўзгаришлардан дарак беради. «Замин»ни Telegram’да ўқинг!