Трамп: “Иқтисодиётда рецессия бўлиши мумкин, аммо охири яхши бўлади”

АҚШ президенти Дональд Трамп мамлакат иқтисодиёти эҳтимолий рецессияга юз тутиши мумкинлигини инкор этмади. Бироқ у бу жараёндан чиқиш ижобий тугашига қатъий ишонади. Бу ҳақда у NBC телеканалига берган интервьюсида алоҳида таъкидлаб ўтди.

“Ҳамма нарса бўлиши мумкин. Лекин менимча, биз мамлакат тарихидаги энг кучли иқтисодиётга эга бўламиз”, — деди Трамп рецессия эҳтимоли ҳақида берилган саволга жавобан.

“Мен хавотирда эмасман”

Америка раҳбари бу масала бўйича катта ташвишга тушмаётганини ва мамлакат иқтисодиёти айни пайтда “ўтиш даври”дан ўтаётганини қайд этди. Унинг фикрича, АҚШ иқтисоди узоққа чўзилмасдан яна барқарор ўсишга қайтади.

“Мен хавотирда эмасман. Бу фақат муваққат жараён. Якунда бизни жуда кучли натижалар кутаяпти”, — дея сўзини давом эттирди Трамп.

Еллен фикри: Тарифлар иқтисодиётга зарба бераяпти

Шу билан бирга, АҚШнинг собиқ молия вазири Жанет Еллен эса бошқа нуқтаи назарни билдирган. У Financial Times нашрига берган суҳбатда, мамлакат рецессия йўлига кириб боришига Трампнинг савдо сиёсати ва жорий этган божлари сабаб бўлаётганини айтди.

“АҚШ айни пайтда Хитойдан фойдали қазилмаларни етказиб беришга қаттиқ боғлиқ. Агар импортга юқори тарифлар сақланса, бу мамлакат иқтисодиётининг турли соҳаларида кучли босим ва заифлашувга олиб келади”, — деди Еллен.

Рецессия нима дегани?

Рецессия — иқтисодий ўсиш суръатининг пасайиши ёки ишлаб чиқаришдаги сўнишни англатадиган атама. У одатда Буюк Депрессия давридан сўнг АҚШда “депрессия” сўзидан қочиш мақсадида жорий қилинган.

Бу атама иқтисодиётдаги муваққат пастлашни, яъни ишлаб чиқариш, истеъмол ва сармоя каби кўрсаткичлар қисқараётганини англатади.

АҚШда иқтисодий ўсиш мавзуси яна сиёсий баҳсларга сабаб бўлмоқда. Президент Трамп иқтисодиётдаги пасайиш эҳтимолини инкор этмаган ҳолда, унинг якуни ижобий бўлишига ишонмоқда. Бошқа тарафдан эса, собиқ расмийлар бу жараённи олдиндан кўраётган хавф сифатида баҳоламоқда.

Сиз нима деб ўйлайсиз — АҚШ иқтисодиёти синовлардан муваффақият билан чиқадими ёки бу рецессия жиддий оқибатларга олиб келадими? «Замин»ни Telegram’да ўқинг!