Рамзон Қодиров лавозимини тарк этмоқчими? Чеченистон раҳбари муҳим баёнот билан чиқди

Россиянинг Чеченистон Республикаси раҳбари Рамзон Қодиров ўз лавозимидан озод этилишини сўраб, юқори раҳбариятга мурожаат қилганини маълум қилди. Бу ҳақда маҳаллий «Чечня сегодня» нашри хабар бермоқда.

Журналистлар республика раҳбарига сўнгги кунларда тарқалган унинг истеъфога чиқиши ҳақидаги турли миш-мишлар юзасидан савол беришган. Қодиров эса кутилмаган жавоб қайтариб, бу ҳақиқатдан ҳам ўз ташаббуси эканини айтган.

«Ҳа, мен ҳам бу гап-сўзларни эшитдим. Оммавий ахборот воситалари ҳар доим ҳар хил нарсаларни ёзиб туради. Лекин вазият улар айтгандан кўра бошқачароқ: мен ўз лавозимимдан озод этилишимни ўзим шахсан сўрадим. Яхши раҳбарлик қилиш учун янги одамнинг ўз ташаббуслари, ўз қарашлари бўлиши керак. Шу сабабли мен ушбу масалани кўтардим ва умид қиламанки, илтимосим юқори раҳбарият томонидан қўллаб-қувватланади», – деди Қодиров.

Шу билан бирга, раҳбар бу гапларни қанчалик жиддий айтгани ёки бу борада ҳазиллашган бўлиши мумкинлиги ҳақида ҳозирча аниқ маълумот йўқ.

Маълум бўлишича, Рамзон Қодиров 2007 йилнинг 5 апрелида Чеченистон раҳбари лавозимига тайинланган ва шу кунга қадар мамлакатдаги бошқа барча ҳудудий раҳбарлардан кўра узоқ муддат ушбу вазифани бажариб келмоқда. Унинг кейинги муддати 2021 йил сентябрида бўлиб ўтган сайловлар орқали янада узайтирилган эди. Россия Марказий сайлов комиссияси томонидан эълон қилинган маълумотларга кўра, Қодиров сайловда иштирок этган сайловчиларнинг 99,7 фоиз овозини олишга муваффақ бўлган.

Қодировнинг айтишича, бу лавозимда янги раҳбарнинг ўз ғоялари билан иш бошлаши республика ривожига янада кўпроқ ижобий таъсир кўрсатиши мумкин. Шу сабабли ҳам у ушбу қарорга келганини таъкидлаган.

Бироқ сиёсий таҳлилчилар ва экспертлар, Қодировнинг бундай кескин қарорлари одатда жамоатчилик диққатини жалб қилиш ва баъзи ички сиёсий масалаларда ўз позициясини кучайтиришга қаратилган бўлиши мумкин, деган фикрни билдирмоқда. Бундан ташқари, Россия федерал ҳукуматининг ушбу илтимосни қандай қабул қилиши ва бу ҳақдаги қарор қачон эълон қилиниши ҳозирча номаълумлигича қолмоқда.

Рамзон Қодировнинг ҳокимиятдан кетиши республика сиёсий майдонида сезиларли ўзгаришларга олиб келиши мумкин. Агар унинг истеъфоси қабул қилинса, Чеченистондаги мавжуд сиёсий ва ижтимоий вазиятда сезиларли ўзгаришлар содир бўлиши эҳтимолдан йироқ эмас.

Ҳозирда Россия жамоатчилиги ва халқаро оммавий ахборот воситалари мазкур мавзу бўйича янгиликларни диққат билан кузатиб турибди. Қодировнинг лавозимидан расман озод этилиши ёки ушбу қарорнинг рад этилиши республика келажагига бевосита таъсир кўрсатадиган муҳим воқелик бўлиб қолиши мумкин. «Замин»ни Telegram’да ўқинг!