АҚШ ва Хитой бир-бирига қарши «бож урушини» тўхтатишга қарор қилди

Америка Қўшма Штатлари ҳамда Хитой ўртасида давом этиб келаётган савдо можаросида муҳим бурилиш кузатилди. Bloomberg агентлигининг хабар беришича, икки мамлакат раҳбарияти ўзаро божхона тарифларини 90 кун муддатга пасайтириш бўйича келишувга эришди.

Женева шаҳрида икки мамлакат вакиллари ўзаро ҳамкорлик бўйича қўшма баёнотни эълон қилди. Унда таъкидланишича, АҚШ ва Хитой ўзаро муносабатлардаги кескинликни юмшатиб, иқтисодий масалалардаги қарама-қаршиликларни ҳал қилиш учун қўшимча вақт беришни мақсад қилган.

Келишув шартларига кўра, Америка томонидан Хитойнинг импорт маҳсулотларига қўйилган 145 фоизлик божхона тарифлари, жумладан, фентанил каби маҳсулотларга ҳам, 30 фоизгача туширилади. Шунингдек, Пекин томони ҳам жавоб тариқасида АҚШ товарлари учун жорий қилинган 125 фоизлик тарифларни 10 фоизгача пасайтириш мажбуриятини олди.

Икки мамлакат ўзаро савдо-иқтисодий алоқаларни муҳокама қилиш учун махсус механизм яратиш ҳақида келишиб олди. Ушбу музокаралар жараёнига Хитой бош вазирининг ўринбосари Ҳе Лифэн, АҚШ молия вазири Скотт Бессент ва АҚШ савдо вакили Жеймисон Грир раҳбарлик қиладиган бўлди.

Музокаралар навбатма-навбат АҚШ, Хитой ёки икки давлат келишган учинчи бир давлат ҳудудида ташкил этилади. Зарурият пайдо бўлган тақдирда, томонлар иқтисодий масалалар бўйича қўшимча маслаҳатлашувларни ишчи гуруҳлар даражасида ўтказади.

Трампнинг савдо можароси тарихи

Эслатиб ўтамиз, 2 апрель куни АҚШ президенти Дональд Трамп барча давлатлар учун 10 фоизлик асосий божхона тарифини белгилаган эди. Аммо бу тарифлар ҳар бир мамлакатнинг АҚШ билан савдо балансидан келиб чиқиб ўзгарган. Хитой билан савдодаги катта дефицит сабабли Америка бу мамлакатга қўйиладиган тарифларни 34 фоизга ошириб юборган.

Пекин ҳам бунга жавоб тариқасида Америка товарлари учун шунча миқдорда тарифларни жорий қилди. Шундан кейин АҚШ раҳбари Хитой ўзининг жавоб чораларидан воз кечмаса, божларни 50 фоизгача кўтариш билан таҳдид қилди. Натижада тарифлар 104 фоизгача кўтарилди, бунга жавобан Хитой ҳам Америка товарлари учун тарифларни 84 фоизгача оширди.

Трамп бунга нисбатан янада қатъийроқ чора кўриб, Хитой товарлари учун тарифларни 125 фоизгача оширди ва кейинчалик бу кўрсаткични 145 фоизга етказди. Хитой ҳам ўз навбатида божхона тарифларини 125 фоизгача кўтарди ва АҚШни «ўзаро тарифлар»дан воз кечишга чақирди. Хитой раҳбари Си Цзиньпин эса «бож урушидан ҳеч бир давлат ғолиб чиқмаслигини» қайд этган эди.

Узоқ давом этган савдо можаросидан кейин икки мамлакат ниҳоят музокаралар столига ўтиришга қарор қилди ва бу борада муҳим келишувларга эришилди.

Zamin.uz таҳририяти АҚШ ва Хитой ўртасидаги иқтисодий муносабатларни диққат билан кузатиб, ўз ўқувчиларига янгиликларни мунтазам равишда етказиб туради. Биз билан бирга қолинг! «Замин»ни Telegram’да ўқинг!