АҚШда фуқароликни реалити-шоу орқали олиш ғояси муҳокамада

Америка Қўшма Штатларида янги, баҳсларга бой реалити-шоу ғояси муҳокамалар марказида турибди. Ички хавфсизлик вазири Кристи Ноэм таклиф этган лойиҳага кўра, бир гуруҳ мигрантлар турли синов ва мураккаб топшириқлар орқали Америка фуқаролигига эришиши мумкин. Бу ҳақда Daily Mail нашри вазирлик томонидан тайёрланган 35 бетлик тақдимотга асосланиб хабар берди.

Лойиҳа номи: “Америкалик”

Шоунинг ишчи номи — “The American” (яъни “Америкалик”) бўлиб, ҳар бир эпизодда қатнашчилар “мерос синови”, “юқотиш синови”, шаҳар ҳокимиятидаги учрашув ва “овоз бериш” жараёнларидан ўтиши керак. Овозлар АҚШ Фуқаролик ва Иммиграция Хизматлари ходимлари томонидан ҳисобланиши режалаштирилган.

Тақдимотга кўра, шоуга машҳур фуқароликка қабул қилинган шахслардан бири — масалан, Украинада туғилган ва кейин АҚШда ном қозонган актриса Мила Кунис бошловчилик қилиши мумкин.

Иштирокчиларга синовлар: олтин қазишдан то автомашина йиғишгача

Шоу формати бўйича қатнашчилар Америка бўйлаб саёҳат қилиши, ҳар бир штатнинг маданияти ва тарихини ўрганиши ва нима учун айнан АҚШда яшашни исташини асослаб беришлари керак. Уларга қўйиладиган амалий синовлар орасида Сан-Францискода олтин қазиб олиш, Детройтда Ford Model T автомобилларини конвейерда йиғиш каби вазифалар ҳам бор.

Финал: қасамёд ва мукофотлар

Финалга чиққан ва ғалаба қозонган иштирокчи АҚШ фуқаролигини олади ва Капитолий зинапоясида қасамёд қилади. Қолган қатнашчилар эса 10 минг долларлик Starbucks совға картаси ёки 76 октанли бензиннинг умрлик захирасига эга бўлиши мумкин. Шунингдек, улар кейинчалик фуқароликка ариза беришда афзалликка эга бўлади.

Расмий изоҳ ва баҳслар

Ички хавфсизлик вазирлиги матбуот котиби Триша Маклафлин мазкур шоу ғояси ҳақиқатан муҳокама этилаётганини тасдиқлади, бироқ Кристи Ноэм тақдимотни шахсан кўрмаганини таъкидлади.

Ижтимоий тармоқлар ва оммавий ахборот воситаларида эса ушбу реалити-лойиҳа юзасидан турли фикрлар билдирилмоқда. Айримлар бу ғояни “ҳақоратли” деб ҳисобласа, бошқалар уни “инновацион ва жиддий танлов тизими” сифатида қабул қилмоқда.

Zamin.uz таҳририяти мазкур ташаббус атрофидаги ривожларни кузатишда давом этади. Сиз бу шоу ғоясини қандай баҳолайсиз? Бу каби синовлар орқали фуқаролик бериш адолатлими? «Замин»ни Telegram’да ўқинг!