Трамп маъмурияти Ғазодан 1 миллион фаластинликни Ливияга кўчирмоқчи

АҚШда Дональд Трамп маъмурияти Ғазо секторидаги гуманитар инқирозни ўзгача йўл билан ҳал қилиш ташаббусини кўриб чиқмоқда. NBC телеканали манбаларининг маълум қилишича, Вашингтон 1 миллион фаластинликни ихтиёрий равишда Ғазодан Ливияга кўчириш механизмини ишлаб чиқмоқда.

Муаммоли ташаббус – Ливия рози бўлса, активлар блокдан чиқарилади

Маълумотларга кўра, АҚШ Ливия ҳукуматига муайян дипломатик имтиёзлар, хусусан, аввал музлатилган активларни қайта фаоллаштириш орқали рағбат бериш ниятида. Бу орқали Трамп маъмурияти фаластинликларнинг кўчишини ташкил этиш учун Ливия розилигини олмоқчи.

Фаластинликлар рози бўладими?

Лойиҳа ҳали якуний тасдиқдан ўтмаган, чунки амалга ошириш жараёнида жиддий тўсиқлар мавжуд. Энг асосий савол — миллионга яқин фаластинлик Ғазони ихтиёрий равишда тарк этишга рози бўладими? Бу ҳақда аниқ жавоб ҳозирча йўқ.

Иқтисодий ёрдам ва рағбат чоралари муҳокамада

Вашингтон маъмурияти кўчиришни осонлаштириш мақсадида фаластинликларга моддий ёрдам кўрсатиш, уларга уй-жой ажратиш, ҳатто муайян миқдорда нафақа бериш имкониятини муҳокама қилмоқда. Аммо бу АҚШ бюджети учун сезиларли харажат талаб қилади.

Ливиянинг ички барқарорлигига таҳдидми?

Телеканал таҳлилчилари таъкидлашича, аллақачон сиёсий ва ижтимоий жиҳатдан ноёб барқарорликда бўлган Ливияда яна 1 миллион мигрантнинг жойлашиши мамлакатдаги вазиятни янада кескинлаштириши мумкин. Қолаверса, уларнинг қайси ҳудудларга жойлаштирилиши ва бу қандай амалга оширилиши ҳозирча номаълумлигича қолмоқда.

Zamin.uz таҳририятидан:
Фаластин-Исроил можаросидаги навбатдаги геосиёсий ғоя бўлган бу ташаббус муҳокама давомида турли баҳсларга сабаб бўлиши шубҳасиз. Сиз бу режани қандай баҳолайсиз? Фаластин муаммосига бу каби ечимлар қанчалик мантиқли? «Замин»ни Telegram’да ўқинг!