Трамп маъмуриятидан Ҳарвардга босим: чет эллик талабалар учун таълим тақиқланди

АҚШда таълим соҳасидаги энг катта инқирозлардан бири юзага келди — мамлакатнинг ички хавфсизлик вазирлиги томонидан қабул қилинган қарорга мувофиқ, машҳур Ҳарвард университети энди алмашинув дастурлари доирасида чет эллик талабаларни қабул қила олмайди. Бу ҳақда The New York Times ўз манбаларга таяниб хабар берди.

Университетга юборилган расмий хатда Ички хавфсизлик вазирлиги алмашинув дастурлари учун талабаларни қабул қилиш ҳуқуқини берадиган сертификатни зудлик билан бекор қилганини маълум қилган. Бу ҳужжат университетга халқаро талабаларни расмий равишда қабул қилиш имконини берувчи муҳим ҳуқуқий асос эди. Энди эса бу ҳуқуқ тўхтатилди.

NYT журналистларининг таъкидлашича, бу қарор ҳукумат билан Ҳарвард университети ўртасидаги мураккаб муносабатларнинг энг юқори нуқтага чиқиши, яъни “қарама-қаршиликнинг жиддий кескинлашуви” сифатида баҳоланмоқда.

Ҳозирча расмий изоҳ берилмаган бўлса-да, масаланинг илдизи анча чуқур. 11 апрел куни Трамп маъмурияти университет раҳбариятига хат юбориб, университет бошқарувида кенг қамровли ислоҳотлар ўтказишни, қабул сиёсатини ўзгартиришни, профессура ва раҳбариятнинг хилма-хиллик ҳақидаги сиёсатини қайта кўриб чиқишни талаб қилганди. Шунингдек, Трамп маъмурияти талабалар ва ўқитувчилар томонидан Фаластинни қўллаб-қувватловчи чиқишларга қарши чора сифатида кампусда ниқоб тақишни тақиқлашни таклиф этган.

14 апрелга келиб эса Трамп маъмурияти томонидан Ҳарвард университетига ажратиладиган 2,2 миллиард долларлик грант маблағлари ва 60 миллион долларлик шартномалар музлатиб қўйилди. Бу қарор АҚШда олий таълим соҳасидаги молиявий сиёсатда ҳам қаттиқ бурилишга сабаб бўлди.

Ўз навбатида, Ҳарвард университети бу қарорга қарши курашиш ниятида эканини очиқ баён қилди. Апрель ойи охирида таълим муассасаси Трамп маъмурияти устидан судга даъво аризасини тайёрлаётганини эълон қилди.

Zamin.uz таҳририятидан:
Чет эллик талабаларнинг таълим олиш ҳуқуқини чеклаш, АҚШ таълим тизимининг эркин ва инклюзив хусусиятига жиддий зарба бўлиши мумкин. Ҳарвард — фақат университет эмас, балки академик сўз эркинлиги, илмий мустақиллик ва глобал таълим меросининг рамзидир. Бу қарор эса таълим соҳасидаги сиёсий босимлар қай даражада хавфли эканини яна бир бор кўрсатиб турибди.

Сиз бу воқеага қандай қарайсиз? Америка таълим тизими ҳақиқатан ҳам сиёсий қуролга айланяптими?