Трамп Путинга икки ҳафта муҳлат берди: Россиянинг ҳаракатлари қандай бўлади?

АҚШ президенти Дональд Трамп Россия президенти Владимир Путинга икки ҳафта муҳлат берди. Ушбу муддат ичида Путин урушни тугатишга ҳаракат қилмаса, Трамп бошқа чоралар кўришини билдирди. Бу ҳақда BBC хабар берди.

Трамп 28 май куни Оқ уйдаги матбуот анжуманида Путин урушни тугатишни хоҳлаш-хоҳламаслиги ҳақида берилган саволга шундай жавоб берди:

“Мен бунга ҳозир жавоб бера олмайман, лекин тахминан икки ҳафтадан кейин айтишим мумкин. Шу муддат ичида Путин бизни алдаб юрибдими ёки йўқлигини билиб оламиз”, деди у.

Трамп сўнгги пайтларда ижтимоий тармоқларда Россия президенти “мутлақо ақлдан озган” ва “олов билан ўйнашмоқда” деб ёзганди.

Россия томонидан амалга оширилаётган бомбардимонлар тўртинчи йил давом этмоқда. Россиянинг Киевга уюштирган охирги зарбаларида камида 13 киши ҳалок бўлиб, яна ўнлаб одам, жумладан, болалар жароҳатланган.

Трампнинг юқоридаги гаплари унинг тобора кучайиб бораётган норозилигидан дарак беради. Чунки Оқ уй Россия ва Украина ўртасида тинчлик келишуви бўйича музокараларни олиб боришга бир неча бор уриниб кўрган, аммо бу уринишлар самара бермаган.

Трамп президентликка келганидан бери, Вашингтон Украинага нисбатан босимни кучайтирган. Бу, жумладан, март ойида АҚШ томонидан саккиз кун давомида ҳарбий ёрдам ва разведка маълумотлари алмашинувининг тўхтатилишини ўз ичига олади.

28 май куни Германиянинг янги канцлери Фридрих Мерц Украинага узоқ масофали ракеталарни ишлаб чиқаришда ёрдам беришини билдирди. Кремль эса, Украинага чекловларсиз қурол берилиши сиёсий келишувларга зарар етказади, деб огоҳлантирди.

Россиянинг қаршилигига қарамай, Трамп тинчликка оид талаблари бўйича позициясини юмшатди — у дастлаб 30 кунлик зудлик билан ўт очишни тўхтатиш чораси талаб қилган (бунга фақат Украина рози бўлган). Эндиликда у Путинга юзма-юз саммит таклиф қилмоқда ва бу орқали муросага эришилиши мумкинлигини айтмоқда. Дипломатик саъй-ҳаракатлар контекстида Трамп Владимир Зеленский ва Владимир Путин билан эҳтимолий учрашувга тайёрлигини маълум қилган.

“Мен бу учрашув яна бир-икки ой олдин бўлиб ўтишини истардим. Ҳозир биз Путин билан ишлаяпмиз ва бу нимага олиб келишини кўрамиз,” дея қўшимча қилди у.

Украина президенти Владимир Зеленский эса Москвани тинчлик жараёнини атайин чўзаётганликда айблаган ва Истанбулда ўтказилган музокаралардан сўнг ваъда қилинган тинчлик меморандумини Россия ҳали ҳам тақдим этмаганини таъкидлаган. Кремль вакили Дмитрий Песков эса ҳужжат “якуний босқичда” эканини маълум қилган.