Лос-Анжелесдаги намойишлар кескинлашди: Трамп ҳарбийларни шаҳарга юборди!

АҚШнинг йирик мегаполиси Лос-Анжелесда ҳибсга олинган ноқонуний муҳожирларни қўллаб-қувватлаш мақсадида уюштирилган оммавий намойишлар учинчи кундирки, тўхтовсиз давом этмоқда. Кеча президент Доналд Трамп шаҳардаги вазият «ҳаддан ташқари ёмонлашгани» ҳақида баёнот бериб, ҳарбий кучларни зудлик билан шаҳарга жойлаштиришга фармон берди.

Норозилик намойишлари бошланганидан бери тинчлик ўрнига тартибсизлик ва зўравонлик кучайиб бормоқда. Миллий гвардия қўшинлари юборилганига қарамасдан, вазиятни назоратга олиш қийинлашган. Шу муносабат билан Трамп ўзининг Truth Social саҳифасида кескин баёнот бериб, Лос-Анжелес полицияси бошлиғи Жим Макдоннел уни вазиятнинг оғирлиги ҳақида огоҳлантирганини айтди.

«Лос-Анжелесдаги вазият ниҳоятда жиддий. Шошилинч равишда қўшинларни юборинг», — деб ёзган Трамп. Шунингдек, у намойишчиларни «бандитлар» деб атай туриб: «Бу бандитларга жазосиз қолиш имконини бермайман. Американи яна буюк қиламиз!» дея кескин баёнот берди. Президент ўз фармони билан юзи ниқоб билан қопланган барча норозилик иштирокчиларини зудлик билан ҳибсга олишни талаб қилди.

Ҳозирча Трампнинг буйруғи билан тахминан 300 нафар Миллий гвардия аскари Лос-Анжелесга жўнатилган. Бироқ маҳаллий хабарларга кўра, бу чоралар шаҳарнинг баъзи ҳудудларида намойишчиларнинг янада фаоллашувига сабаб бўлмоқда. Айниқса, шаҳар марказида жойлашган Метрополитан ҳибсхонаси атрофи можаронинг энг қизғин нуқтасига айланган. Бу ерда хавфсизлик кучлари ва намойишчилар ўртасида жуда кескин тўқнашувлар кузатилмоқда.

Ҳуқуқ-тартибот идоралари кўздан ёш оқизувчи газ, резина ва пластик ўқлар билан тартибсизликни назоратга олишга ҳаракат қилмоқда. Бироқ намойишчилар ўз позицияларидан воз кечмай, ислоҳотлар ва ҳибсга олинганларнинг озод қилиниши талаблари билан чиқишмоқда.

Шаҳар ҳокимияти вазиятни барқарорлаштириш учун ҳаракат қилмоқда, аммо ҳозирча бу чоралар кутилган натижани бермаяпти. Кўпчилик Лос-Анжелесдаги норозиликлар мамлакат миқёсидаги яна катта ижтимоий ва сиёсий инқирознинг бошланишига сабаб бўлиши мумкинлигидан хавотирда.

Фото: Reuters