Трамп Исроилнинг Хоманаийга ҳужум режасини рад этди: сиёсий сатрлар ортида нима бор?

Яқин Шарқда кескинлик авж олган бир пайтда, АҚШ президенти Доналд Трамп Исроилнинг Эрон олий раҳбари оятуллоҳ Али Хоманаийга ҳужум уюштириш режасига вето қўйди. Reuters агентлиги 15 июнь, якшанба куни расмий манбаларга таяниб, Трамп маъмурияти бу масалада кескин позицияни эълон қилганини хабар қилди.

Маълумотга кўра, АҚШ ҳукуматининг юқори лавозимли вакили журналистларга шундай изоҳ берган: “Эронликлар битта америкаликни ўлдирдими? Йўқ. Улар шундай қилмагунча, сиёсий раҳбариятдан (Эрон) ҳеч кимни йўқ қилиш ғояси ҳатто столда ҳам йўқ”. Бу сўзлар Вашингтон учун жонли муносабат ва можаро чегараларини белгилаш нуқтаи назаридан катта аҳамият касб этади.

Исроил бош вазири Биньямин Нетаняҳу эса бу хабарларга нисбатан ўз муносабатини билдирди. Американинг Fox News телеканалига берган интервьюсида у: “Ҳозир ҳеч қачон бўлмаган суҳбатлар ҳақида жуда кўп ёлғон хабарлар бор ва мен бунга қўшилмоқчи эмасман. Айтишим мумкинки, биз қилишимиз керак бўлган ишни қиляпмиз ва қилишимиз керак бўлган ишни қиламиз. Менимча, Қўшма Штатлар АҚШ учун нима яхши ёки нима ёмон эканини билади”, – деб таъкидлади.

Яна бир муҳим жиҳат: The Wall Street Journal нашри илгари исроиллик расмийларга таяниб, Хоманаийга ҳужум қилиш “тақиқланмаган”ини маълум қилган эди. Яъни, Исроил хавфсизлигига таҳдид бор экан, мамлакат ўзини ҳимоя қилиш учун ҳар қандай чорани кўришга тайёрлигини намоён қилган.

Оммавий ахборот воситалари ёзишича, Исроилнинг Эронга қарши ҳарбий амалиётларининг биринчи кунида мамлакат ҳарбий-ҳаво кучлари Али Хоманаий қароргоҳига аниқ зарба бергани ҳақида хабарлар тарқалди. Бу ҳолат минтақадаги низо ва стратегик уринишлар қай даражада жиддий тус олганини яна бир бор намоён этди.

Якуний хулоса қилиб айтганда, АҚШ ва Исроил ўртасидаги ҳарбий-сиёсий муносабатларда қатор очиқ-ёпиқ сўзлар, баёнотлар ва манёврлар кузатилмоқда. Бироқ айни пайтда АҚШ ўз миллий манфаатларини устувор қўяётгани ва минтақадаги можарони чуқурлаштирмасликка интилаётгани маълум бўлмоқда. Минтақа тақдири эса дунё сиёсий саҳнасидаги йирик ўйинчиларнинг ҳар бир қароридан жиддий таъсирланиши турган гап. «Замин»ни Telegram’да ўқинг!