Россия–Украина ўртасидаги уруш яна бир бор тинч аҳоли жойларини нишонга олди. 15 июль, сешанба куни кечқурун Россия Қуролли Кучлари томонидан Украинанинг Харкив шаҳрига йўлланган учувчисиз учоқлар орқали амалга оширилган ҳужум шаҳар аҳолисини даҳшатга солди.
Бу ҳақда Харкив вилояти ҳарбий маъмурияти раҳбари Олег Синегубов шахсан ўзининг Telegram-канали орқали жамоатчиликка хабар берди. Унинг маълум қилишича, атиги 20 дақиқа ичида шаҳарда камида 17 марта кучли портлаш кузатилган. Ҳужум асосан шаҳарнинг Киев туманида жойлашган фуқаролик саноат корхонасига йўналтирилган бўлиб, натижада ёнғин келиб чиққан.
Маълумотларга қараганда, ҳужумда “Герань-2” (Shahed) туркумига мансуб камикадзе дронлар қўлланган. Оқибатда, уч нафар фуқаро тан жароҳати олган. Уларга ҳозирда тиббий ёрдам кўрсатилмоқда.
Айни пайтда, Украина томони ҳам жим турмади. Шу кечаси Украина Қуролли Кучлари Россия ҳудудида жойлашган Воронеж вилоятига дронлар орқали зарба берди. Вилоят губернатори Александр Гусевнинг сўзларига кўра, бу ҳужум натижасида 27 киши жароҳат олган, шундан тўрт нафари вояга етмаганлар. Бир нечта жароҳатланганларнинг аҳволи оғир деб баҳоланмоқда.
Кузатувчилар таъкидлашича, икки томонлама дрон зарбалари тобора тинч аҳоли учун жиддий хавфга айланмоқда. Шу пайтгача фронт чизиғидан йироқда бўлган шаҳарлар ҳам ҳозирда хавфсиз эмас. Янги таҳдидлар, янги жабрланувчилар, янги ёнғинлар. Бу ҳодисалар минтақа тинчлиги учун қўшимча мураккабликлар келтириб чиқариши турган гап.
Фуқаролар ва инсон ҳаётига жиддий таҳдид солаётган дрон ҳужумлари бугунги кунда ҳар икки мамлакат учун ҳам катта синовга айланган. Жаҳон жамоатчилиги эса бу йўқотишларнинг ортида нима тургани, ким қандай жавобгарликни зиммасига олиши кераклиги борасида жиддий ўйлашга мажбур бўлмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
