МРТ аппарати қуролдек ишлаб кетиб эркак ҳаётига зомин бўлди

АҚШнинг Ню-Йорк штатидаги тиббиёт муассасасида содир бўлган фожиа кўпчиликни қўрқитиб қўйди. Вестбери шаҳрида жойлашган хусусий клиникалардан бирида 61 ёшли эркак МРТ аппарати томонидан куч билан тортиб кетилди. Афсуски, у оғир жароҳатлар натижасида ҳаётдан кўз юмди, деб хабар берди ABC телеканали.

Маълум қилинишича, қурбон — мазкур клиника бемори эмас, балки бир танишини кузатиб келган фуқаро бўлган. У қандайдир сабаб билан кўрик хонасига рухсатсиз кириб кетган. Энг даҳшатлиси — унинг бўйнида темир занжир бўлган. Шу заҳотиёқ ишлаб турган МРТ қурилмаси унга реакция қилиб, ерга уриб, оғир жароҳат етказган.

Нассау округи полицияси расмий маълумот берди: қурилма ишлаётган пайтда металл буюмлар билан кириш мутлақо мумкин эмас. Бундай юқори магнит майдонида ҳатто кичик темир детал ҳам фожиага сабаб бўлиши мумкин.

WABC телеканали маълум қилишича, клиника ходимлари дарҳол ёрдамга шошилган, бироқ шифокорларнинг уринишига қарамай, эркак ҳаётга қайтарилмаган. Уни шифохонага етказишдан олдиноқ вафот этгани аниқланган.

Бу воқеа АҚШ тиббиёт муассасаларида хавфсизлик протоколлари қанчалик қаттиқ бўлиши кераклигини яна бир бор кўрсатди. Ҳозирда клиникада ички хизмат текшируви бошланган. МРТ хонасига киришдаги назоратсизлик ёки хизматчиларнинг эътиборсизлиги ҳам ўрганилади.

Тиббиёт ходимлари инсонлардан яна бир бор эҳтиёткор бўлишни, айниқса магнит-резонанс томография каби юқори технологияли жиҳозлар фаолият кўрсатаётган вақтда темир буюмлардан бутунлай воз кечишни сўрамоқда.

Айни пайтда, ушбу мудҳиш воқеа ортидан АҚШда клиника ва шифохоналарда МРТ хавфсизлиги бўйича янги талаблар ишлаб чиқилиши эҳтимоли кўрилмоқда. «Замин»ни Telegram’да ўқинг!