Ёзнинг жазирама кунларида АҚШнинг турли шаҳарларида чиқиндилар йиғилмай қолаяпгани жиддий муаммога айланмоқда. Бу ҳолат хусусий чиқинди ташиш компанияси – Republic Services ишчилари томонидан ўтказилаётган иш ташлашлар натижасида юзага келмоқда. Ишчилар меҳнат ҳақи ва ижтимоий таъминот шартларининг ёмонлигидан шикоят қилмоқда. Натижада, миллионлаб америкаликлар чиқинди муаммоси билан юзма-юз қолди.
Иш ташлашлар бутун мамлакат бўйлаб тарқалди
1-июл куни Бостон яқинидаги 14 та шаҳарни қамраб олган Teamsters Local 25 касаба уюшмаси чиқиндихона ходимлари иш ташлашни бошлади. Кейинчалик бу ҳаракат Калифорния, Иллинойс, Жоржия ва Вашингтон штатларига ҳам тарқалди. Айрим шаҳарлар билан келишувга эришилган бўлса-да, кўплаб ҳудудларда вазият ҳануз ҳал бўлмаган.
Малден шаҳридан бўлган 17 йиллик тажрибага эга ҳайдовчи Майк Ортис шундай дейди:
"Улар таклиф қилаётган маош билан бир ой ҳам яшаб бўлмайди."
Иш ташлаган ходимларнинг умумий сони 2000 нафардан ошди. Улар ускуналарнинг носозлиги, гигиеник шароитларнинг ёмонлиги ва хавфли меҳнат муҳитидан норозилик билдирмоқда.
Хусумат судгача борди
Republic Services компанияси иш ташлашлар давомида касаба уюшмасини ноқонуний ҳаракатларда айблади – шиналарни тешиб чиқиш, кимёвий моддалар сепиш, ҳайдовчиларга тажовуз қилиш сингари айбловлар қўйилган. Бироқ Teamsters буларни қатъиян рад этмоқда.
Ахлат — босим воситасига айланди
Мутахассисларнинг фикрича, чиқиндиларнинг очиқда тўпланиб ётиши, айниқса ёзда, соғлиқ ва гигиенага таҳдид туғдиради. Бу эса ишчилар фойдасига жамоатчилик босимини кучайтиради. Масалан, Филаделфияда жамоат ишчилари иш ташлаганида атиги 8 кун ичида келишувга эришилган.
Ечимлар қийин, музокаралар тўхтаган
Баъзи шаҳарларда муқобил чиқинди йиғиш пунктлари ташкил этилди. Айрим жойларда эса бошқа хусусий компаниялар билан вақтинчалик шартномалар тузилди. Аммо бу бюджетга қўшимча харажатларни юкламоқда.
